Nú eru staðfest smit orðin 11 í Vestmannaeyjum og eru 282 í sóttkví. Nýjasta staðfesta smitið varðar kennara í Grunnskóla Vestmannaeyja og var ákveðið að setja nemendur í 1.-4. bekk og alla starfsmenn skólans í svokallaða úrvinnslukví á meðan málið er til skoðunar. Þá er árgangur 2007 enn í úrvinnslukví þar sem enn er beðið sýna frá nemendum en næstum öll sýni sem rannsökuð hafa verið eru neikvæð.
Eins og fram hefur komið hafa öll tilfellin komið fram síðan á sunnudag og mikilvægt að spyrna kröftuglega við fótum. Af þeim sökum vill aðgerðastjórn beina því til íbúa Vestmannaeyja að halda sig eins mikið heima og mögulegt er næstu daga og forðast margmenni eins og kostur er. Þá er ánægjulegt að finna hversu þétt samfélagið stendur saman og hafa margir boðið fram aðstoð sína.
