20.03.2020
Það er margt sem fer í gegnum hugann þegar hugsað er tilbaka og til síðustu fimm daga. Í tvo mánuði höfðum við undirbúið okkur undir útbreiðslu faraldurs sem hóf að breiða úr sér frá Kína í desember og mörgum þótti óraunverulegt. Svokallaða kórónaveiru sem síðar fékk sjúkdómsnafnið COVID-19 og hvert mannsbarn þekkir í dag.
15 dögum eftir að veiran kom til Íslands rataði hún til Vestmannaeyja enda hvergi betra að vera.
Á aðeins 5 dögum urðu tilfellin 11 í Vestmannaeyjum sem hefur kallað á öflugt viðbragð heimamanna. Nú erum við stödd í almannavarnaástandi með virkjaða aðgerðastjórn og alls kyns úrræði fyrir smitaða, fólk í sóttkví og fólk sem þarf aðstoð við daglegar athafnir. Allir vinna saman sem einn maður þar sem einblínt er á að hefta útbreiðslu veirunnar.
Mikið hefur mætt á. Smit hefur komið upp hjá lögreglu, hjá heilbrigðisstofnuninni, hjá leikskóla, grunnskóla, íþróttahúsi en allar aðgerðir vegna þessa hafa verið fumlausar og unnar af yfirvegun.
Aðgerðirnar snerta marga og eru sérstakar þó ekki sé kveðið sterkara að orði.
Það eru margir sem hafa þurft að skipta um gír, fara í önnur hlutverk og takast á við nýja hluti án nokkurs fyrirvara. Þið eruð öll að standa ykkur gríðarlega vel við erfiðar aðstæður. Höldum áfram að standa með hvert öðru og sýna virðingu og kærleika. Þetta ástand líður hjá.
Páley Borgþórsdóttir, aðgerðastjóri og lögreglustjóri Vestmannaeyja.
Forsíðumynd Helgi R. Tórshamar
