Ísfisktogarinn Vestmannaey VE hélt til veiða sunnudaginn 19. júlí sl. að afloknu tæplega þriggja vikna stoppi. Heimasíða vsn.is sló á þráðinn til Egils Guðna Guðnasonar skipstjóra og spurði hvernig hefði gengið.
“Við byrjuðum í ýsu á Broadway og lönduðum rúmlega fimmtíu tonnum í Eyjum á miðvikudag. Síðan var farið í Skerjadýpið í þeim tilgangi að reyna við karfa. Í Skerjadýpinu vorum við í tæpa þrjá sólarhringa og lönduðum síðan um 55 tonnum af karfa í Grindavík í gær. Nú erum við á leiðinni á Ingólfshöfðann og er ráðgert að landa í Eyjum í dag miðvikudag. Síðan tekur við þjóðhátíðarstopp og mikið stuð,” sagði Egill Guðni.
