Útlagningarskipið Seven Navica kom til hafnar í Vestmannaeyjum í gærmorgun með hina nýju almannavarnarlögn, NSL-4, um borð. Um er að ræða 12,7 kílómetra langa vatnslögn sem framleidd var í Danmörku af fyrirtækinu NOV, en sama fyrirtæki framleiddi einnig NSL3 lögnina sem lögð var árið 2008.
Rétt um miðnætti í gær fór fyrri endi lagnarinnar í sjóinn þar sem björgunarskipið Þór tók við honum og útlagning hófst formlega. Í morgun höfðu rúmlega 600 metrar verið lagðir en verkið miðar vel og fara tæplega 100 metrar í sjóinn á hverri klukkustund. Áætlað er að lögnin taki land í Landeyjarsandi í kvöld.
Verkís verkfræðistofa hefur haft umsjón með verkefninu fyrir hönd Vestmannaeyjabæjar og er Brynjar Ólafson sviðstjóri umhverfis- og framkvæmdarsviðs verkefnastjóri fyrir hönd bæjarins.
Áætlað er að útlagningu ljúki um helgina.
