06.03.2020
Fjögur tilfelli innanlandssmits hafa nú verið staðfest hér á landi en þetta staðfestir Víðir Reynisson, yfirlögregluþjónn hjá almannavarnadeild Ríkislögreglustjóra, í samtali við Fréttablaðið.
Líkt og greint var frá fyrr í dag var viðbúnaðarstig almannavarna hækkað úr áhættustigi í neyðarstig fyrr í dag
Staðfest tilfelli eru orðin 45. Að sögn Víðis eiga þau sem smituðust innanlands öll tengingu við fólk sem hafði verið á skíðaferðalagi á Ítalíu og í Austurríki.
Þau smituðu eru nú öll í einangrun en auk þeirra eru 326 manns í sóttkví. Um 70 sýni hafa verið rannsökuð í dag en frá upphafi hafa um 400 sýni verið rannsökuð.
Uppfært 19:07:
Þórólfur Guðnason sóttarnalæknir greindi frá því í kvöldfréttum RÚV að innanlandssmitin væru orðin fjögur og að heildarfjöldi smita væri 45.
Innanlandssmit kórónuveirunnar sem valdið getur sjúkdómnum COVID-19 eru orðin þrjú hér á landi. Staðfest smittilfelli eru þó enn 43, en fyrr í dag var greint frá því að tvö tilfelli hefðu smitast innanlands. Nú hefur þriðja smitið bæst við, en það hafði áður ekki verið flokkað sem innanlandssmit.
Víðir Reynisson, yfirlögregluþjónn hjá embætti Ríkislögreglustjóra, staðfesti þetta í samtali við fréttastofu nú rétt í þessu.
Fyrr í dag var tekin ákvörðun um að lýsa yfir neyðarstigi almannavarna. Víðir segir að þetta komi þó ekki til með að hafa áhrif á almenning. Neyðarstigið lúti frekar að um 200 stofnunum og fyrirtækjum sem þurfi að herða eigið skipulag.
Ekki sé búið að taka ákvörðun um að setja á samkomubann, en Víðir segir að það hljóti þó að fara að „styttast í þann tímapunkt.“ Almannavarnir hafi verið í nánu samtali við íþróttahreyfinguna í þessum efnum.
Fréttin er tekin frá visi.is
