- Bæjarfjölmiðillinn í Vestmanneyjum -

Tía – tómstundir, íþróttir og ADHD

ADHD – Eyjar stendur fyrir yfirgripsmiklu námskeiði 3. og 4. maí næstkomandi fyrir alla þá sem starfa í kringum íþróttir og tómstundir barna. Námskeiðið er einnig ætlað þeim sem vinna með og umgangast börn í þeirra tómstundum og frítíma (skólaliðar, stuðningsfulltrúar, starfsfólk íþróttahúsins).

Við höfum unnið að því að koma þessu námskeiði hingað til eyja í rúmlega ár og virkilega ánægjulegt að loks hafi allt gengið upp. Skipulag á svona námskeiði kallar á góða samvinnu margra. Við erum svo lánsöm að Vestmannaeyjabær styrkir verkefnið myndarlega ásamt því að við höfum fengið frábæran styrk frá saumakonunum Sigurlaugu og Erlu sem saumuðu grímur í Covid,seldu og gáfu allan ágóðann til okkar ásamt að Oddfellow stúkan Vilborg styrkti okkur líka.
Við höfum unnið þetta í samvinnu við ÍBV ásamt því að vera í sambandi við alla sem vinna með börnum í skipulögðu tómstundastarfi.
Leiðbeinendur í námskeiðinu eru Bóas Valdórsson klínískur sálfræðingur sem starfar sem sálfræðingur við MH og Jakob Frímann Þorsteinsson, MA í náms- og kennslufræðum, og sem hafa veg og vanda að námskeiðinu.
Almennt er þetta námskeið haldið í tvennu lagi þar sem 2-3 vikur líða milli námskeiðslota. Í samráði við Bóas teljum við að okkar hópi gagnist betur að þetta sé eitt skipti þar sem farið verður yfir öll helstu atriðin.

Hvað er TÍA
TÍA er hnitmiðað og fjölbreytt námskeið um ADHD fyrir alla þá sem starfa við íþrótta – og tómstundastarf sem og aðra aðila sem koma að skipulögðu starfi krakka með ADHD.
Á námskeiðinu fá þátttakendur hagnýt verkfæri, þjálfast í að nota þau, fræðslu um ADHD og gagnleg ráð. Unnið með reynslumiðuðum hætti með fyrri reynslu þátttakenda og efni námskeiðsins.
Farið er yfir mikilvæga þætti í öllu hópastarfi þar sem einkenni hópaþróunar er tekin fyrir og farið í hvernig stjórnandi hópsins getur nýtt þá krafta sem búa í hverjum hóp með jákvæðum hætti.
Rætt er um gagnlega samskiptahætti, markmiðasetningu og mikilvægi þess að leiðbeinendur virkji þátttakendur á jákvæðan og eflandi hátt.
Þjálfarar, leiðbeinendur og starfsfólk sem vinnur með börnum fá aðgengi að praktískum aðferðum við að vinna með krökkum með ADHD frá sérfræðingum á sviðinu. Þrátt fyrir að námskeiðið sé skipulagt út frá krökkum með ADHD þá gagnast það að sjálfsögðu öllum börnum.

Fyrirkomulag námskeiðsins.
Námskeiðið verður haldið þriðjudaginn 3. maí 14-17 og miðvikudaginn 4. maí og geta þátttakendur því valið hvor dagurinn hentar þeim betur.

Spjallfundur
Í tengslum við þetta námskeið verðum við svo með spjallfund þriðjudagskvöldið 3. maí sem er þá ætlað foreldrum og öðrum aðstandendum barna. Með þeim hætti teljum við að við gætum náð mjög góðum árangri í fræðslu og samræmingu milli heimilis, skóla og tómstunda. Staðsetning námskeiðs og spjallfundar verður í Kiwanis

Markmið Tíunnar er að gera leiðbeinendur í íþrótta- og tómstundastarfi hæfari til að vinna með börnum og unglingum með ADHD. Fræða þá um mismunandi birtingarmyndir röskunarinnar og kenna aðferðir og benda á leiðir til þess að styrkja einstaklinga með ADHD. Með hæfari leiðbeinendur eru meiri líkur til þess að allir iðkendur njóti sín betur í skipulögðu íþrótta- og tómstundastarfi.
Aukinn skilningur og þekking leiðbeinenda íþrótta- og tómstundastarfi á ADHD dregur bæði úr fordómum og gerir börnum og unglingum með ADHD kleift að stunda íþróttir og tómstundir til jafns við aðra. Börnum og unglingum með ADHD er margfalt hættara við að sýna andfélagslega hegðun, neyta vímuefna og stunda afbrot. Forvarnargildi verkefnisins er því ótvírætt og mikilvægt fyrir samfélagið að börn og unglingar með ADHD séu í skipulögðu íþrótta- og tómstundastarfi.

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:

  • Heilsíða 170 x 240 mm + 3 mm blæðing 
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing
 
Hafðu samband fyrir verð tigull@tigull.is eða í síma 856-4250

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is