Sigurlaug Birna Leudóttir, einnig þekkt sem Silla Berg, lærði handritsgerð í Vancouver Film School. Hún útskrifaðist þaðan haustið 2015 og hefur síðan verið að vinna í kvikmyndagerð hérlendis. Einn af hennar hlestu samstarfsaðilum er Belginn Frank Nieuwnhuis sem varð svo heillaður af landi og þjóð að hann flutti til Íslands eftir fyrstu heimsóknina sína. Frank er menntaður klippari og hefur einnig komið að kvikmyndagerð, bæði hér og í Belgíu, undanfarin ár.
Aðspurð að kveikjunni að Heim þá sagði Silla að hana hafi alltaf langað til að skapa og taka eitthvað upp í Eyjum. “Þetta var búið að blunda lengi í mér en það vantaði alltaf söguna og ætli að ég hafi ekki líka miklað þetta fyrir mér. Það var ekki fyrr enn við Frank byrjuðum að vinna saman að hugmyndin varð að veruleika. Við vinnum mikið með að skora á okkur sjálf og sjá hvað við getum skapað og tekið upp bara við tvö. Ég hafði skrifað stuttan texta fyrir löngu, sem ég les upphátt í myndbandinu, og við ákváðum að skoða betur og nota sem nokkurskonar handrit fyrir tökurnar. Við ákváðum svo að skella okkur heim til Eyja í byrjun mars og tókum þetta upp yfir eina helgi.” Silla er mjög sátt við lokaútkomuna og vonar að heimamenn, og aðrir, njóti vel. “Eyjarnar eru náttúrulega fallegasti staður í heimi og löngu kominn tími til að einhver sýni það almennilega.”
