17.01.2020
Það eru þrjú ár síðan byrjað var að teikna nýja Bergey því var mikil gleði þegar hún sigldi undurfögur inn í Vestmannaeyjahöfn í morgun í fyrsta sinn. Bergey var afhent Bergi-Huginn, dótturfyrirtæki Síldarvinnslunnar, hinn 1. október síðastliðinn og kom til Akureyrar hinn 6. október. Bergey hefur verið í Slippnum á Akureyri síðan í október við frágang á millidekki.
Bergey var smíðuð í skipasmíðastöð Vard í Aukra í Noregi og er eitt af sjö systurskipum sem skipasmíðastöðin smíðaði fyrir íslensk fyrirtæki þar og meðal Vestmannaey VE.
Veiðarfæri verða tekin um borð og er gert ráð fyrir að haldið verði til veiða í fyrramálið. Jón Valgeirsson skipstjóri segir að sér lítist mjög vel á skipið. „Það verður gaman að hefja veiðar á þessu nýja skipi. Á leiðinni frá Akureyri fengum við aðeins brælu úti fyrir Norðurlandinu og það lét ágætlega. Það eru öðruvísi hreyfingar á þessu skipi en á gömlu Bergey. Það er flott að hefja veiðar á nýju skipi á laugardegi: Laugardagur til lukku,“ sagði Jón glaður í bragði.
Bergey er með 12 menn í áhöfn og tekur 240 kör eða 70 tonn.
Tígull óskar Berg-Huginn og Síldarvinnslunni til hamingju með glæsilegt skip.
Njáll Ragnarsson, Jón Valgeirsson, Arnar Richards
