13.11.2020
Sunnudaginn 15. nóvember hvetja Barnaheill landsmenn til að leggja frá sér símann og önnur snjalltæki í 12 klukkustundir (klukkan 9-21).
Með uppátækinu vilja þau vekja foreldra og annað fullorðið fólk til umhugsunar um snjalltækjanotkun innan heimilisins og þau áhrif sem tækin geta haft á samverustundir fjölskyldunnar.
Snjallsímar og önnur snjalltæki eru skemmtileg og gagnleg tæki sem hafa umbylt því hernig við eigum í samskiptum, nálgumst upplýsingar og verjum tíma okkar. Í mörgum tilvikum eru áhrif tækninnar jákvæð og sniðgug en einnig hefur verið bent á skuggahliðar hennar.
Óhófleg notkun á snjalltækjum getur meðal annars haft áhrif á samskipti innan fjölskyldunnar – samskiptin og nándin minnka því það er eitthvað annað sem stelur athyglinni.
Yfirskrift átaksins er: „Upplifum ævintýrin saman“ til að minna okkur á þau ævintýri sem geta falist í samverustundum foreldra og barna þegar síminn er hvíldur um stund.
Hægt er að skrá sig til leiks á www.simalaus.is og taka áskorun Barnaheilla. Allir þátttakendur eiga möguleika á að vinna fjölbreytta og fjölskylduvæna útdráttarvinninga og fá auk þess nokkur góð ráð send laugardaginn 14. nóvember.
Meðal vinninga eru:
- Helgargisting í bústað í vetur hjá Minniborgum
- Gjafabréf í Klifurhúsið fyrir fjölskylduna
- Keila, pizza og shake fyrir fjögurra manna fjölskyldu hjá Keiluhöllinni
- Gjafabréf fyrir 9 holu hring fyrir fjögurra manna fjölskyldu hjá Minigarðinum
- Fjölskylduspilið Út fyrir kassann frá Munum
- Föndursett frá A4
- Fjölskyldumáltíðir frá KFC, Dominos og Grill 66
Greint er frá þessu á vef Barnaheill.is
