Huginn VE var nýkominn til heimahafnar í Vestmannaeyjum með síldarfarm þegar Halldór B. Halldórsson tók Valdimar Gest Hafsteinsson skipstjóra tali. Þetta var þriðji túr skipsins á norsk-íslenskri síld, en að sögn Valdimars hefur einnig verið talsvert af íslenskri síld með í aflanum.
Sindri Viðarsson, sviðsstjóri veiða og vinnslu hjá Vinnslustöðinni, segir veiðarnar nú beinast að norsk-íslensku síldinni, sem sé lítillega blönduð íslenskri síld. Um 5.500 tonn séu eftir af norsk-íslenska síldarkvótanum og reiknað með að veiðum úr honum ljúki á næstu tveimur vikum eða í kringum miðjan október.
Í framhaldinu er stefnt að því að hefja veiðar á íslenskri síld í síðustu viku október. Kvóti Vinnslustöðvarinnar í henni er 9.700 tonn, en hluti hans verður veiddur með norsk-íslensku síldinni.
Þá er einnig horft til komandi loðnuvertíðar. Sindri segir beðið með eftirvæntingu eftir upplýsingum frá Hafrannsóknastofnun um nýafstaðinn loðnuleiðangur og vonast eftir fréttum í kringum 10. október.
Viðtal Halldórs við Valdimar Gest má sjá í myndbandinu hér að neðan.
