Það hefur eflaust ekki farið framhjá neinum að leiðindi eru í veðurkortunum næstu daga. Herjólfur sigldi til Þorlákshafnar í morgun en ætlar sér að minnsta kosti tvær ferðir til Landeyjahafnar á í síðar í dag. „Herjólfur siglir til Landeyjahafnar amk tvær ferðir eftir hádegi í dag. Brottför frá Vestmannaeyjum kl. 14:30 og 17:00. Brottför frá Landeyjahöfn kl. 15:45 og 18:15,“ segir í tilkynningu frá Herjólfi sem barst rétt í þessu. „Aldan á að hækka þegar líða tekur á kvöldið, því hvetjum við farþega til þess að ferðast fyrr en seinna ef þeir hafa tök á.
Tilkynning hvað varðar síðustu tvær ferðir kvöldsins verður gefin út fyrir kl. 18:00 í kvöld.“
Miðað við ölduspá verður að teljast ólíklegt að siglt verði til Landeyjahafnar á morgun laugardag og sunnudagurinn lítur heldur ekkert alltof vel út með siglingar þangað. Aldan fer þá lækkandi, hægt og bítandi þegar líður á sunnudaginn og fram á mánudag en á svo að rísa aftur þegar líður á næstu viku. Er því um að gera fyrir fólk sem hyggst á ferðalag að fylgjast vel með.
