Sebastiano Caboto komið til Vestmannaeyja Lúxemborgska dýpkunarskipið Sebastiano Caboto kom til Vestmannaeyja í dag.
Skipið er í eigu stórfyrirtækisins Jan De Nul, sem hefur tekið að sér dýpkun Landeyjahafnar næstu þrjú árin. Koma skipsins hefur verið beðið með nokkurri eftirvæntingu í Vestmannaeyjum, enda er viðhaldsdýpkun Landeyjahafnar ein af lykilforsendum þess að tryggja megi öruggar og reglulegar siglingar Herjólfs milli lands og Eyja yfir vetrarmánuðina.
Vegagerðin samdi í vor við Jan De Nul um viðhaldsdýpkun Landeyjahafnar á árunum 2026–2029. Fyrirtækið er meðal stærstu dýpkunarfyrirtækja heims og þekkir vel til aðstæðna við Landeyjahöfn, en það annaðist dýpkun þar á árunum 2015–2018.
Sebastiano Caboto er öflugt dýpkunarskip, smíðað árið 2011. Það er rúmlega 93 metra langt og tæplega 20 metra breitt. Skipið getur tekið um 3.400 rúmmetra í lest og dýpkað niður á allt að 26,5 metra dýpi.
Samkvæmt samningi Vegagerðarinnar er gert ráð fyrir dýpkunarframkvæmdum frá september og fram í apríl ár hvert. Áætlað er að fjarlægja þurfi á bilinu 250.000 til 500.000 rúmmetra af efni á ári úr og við Landeyjahöfn.
Miklar væntingar eru bundnar við komu Jan De Nul og Sebastiano Caboto, ekki síst eftir erfiða stöðu í samgöngum milli lands og Eyja síðasta vetur. Öflug og markviss dýpkun Landeyjahafnar skiptir Eyjamenn miklu máli, enda er höfnin lykillinn að öruggum og greiðum heilsárssamgöngum við fastalandið.
Mynd og texti: Magnús Bragason.
