- Bæjarfjölmiðillinn í Vestmanneyjum -

Samgöngumál á réttri leið!

Samgöngumálin. Þetta eina orð er langoftast svarið þegar Eyjamenn eru spurðir hvaða mál það er sem er efst á baugi í samfélaginu – hvort sem það eru kosningar framundan eða ekki. Svona hefur þetta verið frá því að ég man eftir mér – og mun sjálfsagt verða líka þegar ég verð hættur að muna eftir mér!

Þegar koma erfiðir mánuðir í samgöngunum – eins og voru núna í febrúar og mars þegar þurfti að fella niður fjölmargar ferðir í Landeyjahöfn – hættir okkur til að gleyma hversu mikið hefur áunnist í þessum málum bara á allra síðustu árum. (Og ágætt að muna líka, að ef þessi ótíð hefði ekki komið til núna hefði þetta verið þriðji veturinn í röð sem ekki hefði þurft að fella niður siglingar í Landeyjahöfn vegna dýpis).

Lítum á nokkur atriði:
Dýpkunartímabil felld niður
Fyrstu samningarnir um dýpkun Landeyjahafnar fólu það í sér að engin skuldbinding var um viðhaldsdýpkun hafnarinnar í desember, janúar og febrúar. Þetta sýndi í raun það viðhorf samgönguyfirvalda að Landeyjahöfn gæti ekki/þyrfti ekki að vera opin allt árið. Horfið var frá þessum skilningi 2019; dýpkunarskip gert tiltækt allan veturinn og þannig viðurkennt að freista ætti þess að halda höfninni opinni allan veturinn líka.

Nýr samningur um rekstur Herjólfs
Upphaflegi samningurinn milli Vestmannaeyjabæjar og Vegagerðarinnar fól í sér mikla fjárhagslega áhættu bæjarins af rekstrinum. Með nýjum samningi 2020 var þessi fjárhagsáhætta bæjarins, og þar með allra Eyjamanna, minnkuð og henni skipt með réttlátari hætti á milli eiganda skipsins, Vegagerðarinnar, og rekstraraðila.

Úttekt á Landeyjahöfn
Haustið 2020 var lokið fyrri hluta óháðrar úttektar á Landeyjahöfn. Ráðist var í þessa úttekt á grundvelli tillögu sem ég var fyrsti flutningsmaður að og fékk samþykkta á Alþingi. Síðari hluti úttektarinnar fer í útboð núna í maí og að henni lokinni verður hægt að taka ákvarðanir um þær endurbætur á Landeyjahöfn sem gera hana að þeirri heilsárshöfn sem heitið var í upphafi.

Stóraukin dýpkunargeta framundan
Núgildandi samningur Vegagerðar­innar við Björgun um viðhaldsdýpkun í Landeyjahöfn rennur út innan skamms. Ég benti á það í ræðu á Alþingi á sínum tíma, þegar þessi samningur var í burðarliðnum, að þar væru gerðar alltof litlar kröfur um afkastagetu þess búnaðar, sem notaður yrði við dýpkunina, og tæknilega hæfni til athafna við vondar aðstæður í vindi og öldu. Í nýju útboði á dýpkun, sem auglýst verður á næstu vikum, verða sem betur fer gerðar stórauknar kröfur um margföld afköst og tæknilega getu þess dýpkunarskips sem verður notað.

Ríkisstyrkt áætlunarflug
Með tilkomu Landeyjahafnar 2010 hætti ríkið, illu heilli, að styrkja áætlunarflug milli lands og Eyja. Síðan hefur gengið á ýmsu með áætlunarflug á markaðsforsendum og það hætti síðan alveg síðasta haust. Ástæðan er einföld segja flugfélögin: það eru ekki nógu margir sem nota flugið til að það borgi sig. Bæjaryfirvöldum tókst þó að koma því til leiðar að ríkið styrkti ákveðnar lágmarksflugsamgöngur. Lengi vel var því haldið fram að það myndi ekki samræmast Evrópureglum að ríkið styrkti flug til Eyja vegna þess að fyrir væru ríkisstyrktar siglingar, en nú hafa samgönguyfirvöld komist að þeirri niðurstöðu að svo er ekki. Og nú er Vegagerðin að ljúka undirbúningi fyrir útboð á flugi milli lands og Eyja, þótt vissulega eigi síðan eftir að tryggja fjármagnið.

Göngin!
Þegar horft er til lengri framtíðar í samgöngumálum endurvaknar auðvitað alltaf hugmyndin um göng milli lands og Eyja. Tækni­framfarir hafa orðið miklar á þessu sviði frá því að umræðan um þessi mál stóð sem hæst, m.a. í gerð „ofanáliggjandi“ gangna þannig að ekki þurfi að bora sig í gegnum hafsbotninn. Nú liggur fyrir loforð samgönguyfirvalda um að ljúka rannsóknum og fýsileikakönnun á þessu verkefni.

Gjörbreyting á samskiptumvið samgönguyfirvöld
Síðustu fimm ár fylgdist ég sem þingmaður býsna vel með samskiptum bæjaryfirvalda við ríkisvaldið um samgöngumál. Tók reyndar þátt í ýmsum þeirra og reyndi að leggja mitt af mörkum. Sum málin tók ég upp á Alþingi til að tryggja framgang þeirra.
Það er skemmst frá því að segja að á nokkrum síðustu árum hefur orðið algjör viðhorfsbreyting hjá samgönguyfirvöldum varðandi þessi málefni okkar Vestmanna­eyinga. Þetta gildir bæði um
Vegagerð­ina og Samgöngu­ráðuneytið. Þar sem okkur var áður mætt með talsverðri stífni og tortryggni hefur nú tekið við vilji til samstarfs um að leysa úr vandamálum og viðfangsefnum. Upptalningin hér fyrir ofan er til vitnis um það hversu miklu hefur verið áorkað á síðustu 3-4 árum. Á þessu eru líklega nokkrar skýringar en ein þeirra er örugglega sú ákveðna og þétta – en jafnframt kurteislega – hagsmunagæsla sem bæjaryfirvöld hafa staðið fyrir.

Höldum henni áfram!

Páll Magnússon
Oddviti H-lista Fyrir Heimaey

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:

  • Heilsíða 170 x 240 mm + 3 mm blæðing 
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing
 
Hafðu samband fyrir verð tigull@tigull.is eða í síma 856-4250

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is