22.10.2020
Í fyrsta sinn í sögu Grunnskóla Vestmannaeyja voru foreldrafundir haldnir eingöngu á rafrænu formi. Tígull heyrði í Önnu Rós skólastjóra og fékk að heyra hvernig gekk.
Þetta gekk allt mjög vel á heildina litið. Þetta var auðvitað í fyrsta sinn sem við vorum með rafræn foreldraviðtöl, svo við þurftum að undirbúa okkur vel. Reynsla okkar af fjarkennslunni í vor kom að góðum notum, bæði fyrir kennara, nemendur og foreldra. Flestir höfðu notað áður þau forrit sem nýtt voru í viðtölin.
Guðbjörg Guðmannsdóttir verkefnastjóri í upplýsingatækni var kennurum innan handar í undirbúningi, hún gerði leiðbeiningar fyrir foreldra og studdi vel við bakið á kennurunum ásamt stjórnendum.
Við sendum út könnun á foreldra og umsjónarkennara í kjölfarið af viðtölunum og fengum um 200 svör frá foreldrum.
Það voru tæp 95% foreldra sem voru jákvæð eða mjög jákvæð (75% mjög jákvæð) þegar spurt var um upplifun þeirra af viðtölunum.
Einnig svöruðu foreldrar því að leiðbeiningar frá skólanum hafi verið skýrar (75%) og um 66% væru til í að nýta sér rafræna foreldrafundi í framtíðinni.
Upplifun kennara var líka mjög góð, viðtölin voru skilvirk og góð, en kannski ekki eins persónuleg. Þetta er án efa möguleiki sem hægt verður að nýta meira í skólastarfinu.
Við lærðum heilmikið af þessu, þetta styrkti kennarana okkar enn frekar í notkun á tækninni. Þetta gefur til dæmis meiri möguleika á því að báðir foreldrar geti verið viðstaddir foreldraviðtal þó þeir séu ekki endilega á sama stað þegar viðtalið fer fram og foreldri og nemandi ekki endilega á sama stað, þetta var eitt af því sem við gátum nýtt okkur í viðtölunum núna.
Þetta var spennandi verkefni, sem gekk vonum framar.
Við erum þakklát foreldrum fyrir samvinnuna og jákvæðnina og eins og fyrr segir, er þarna kominn nýr möguleiki í samskiptum heimilis og skóla sem eru svo mikilvæg segir Annar Rós að lokum.
