Bæjarstjórnarfundur var haldinn síðastliðinn fimmtudag og var þar meðal annars rætt um byggingu nýs hjúkrunarheimilis í Vestmannaeyjum.
Bæjarstjórn leggur til að bæjarstjóra og formanni bæjarráðs verði falið að óska eftir samtali við heilbrigðisráðherra og fjármálaráðherra um byggingu nýs hjúkrunarheimilis í Vestmannaeyjum.
Hraunbúðir hefur þjónað hlutverki sínu vel í bráðum 50 ár. Kröfur samtímans kalla hins vegar á bætta aðstöðu, stór hluti hússins er kominn til ára sinna. Það er því orðið tímabært að huga að byggingu á nýju hjúkrunarheimili, líta til fleiri staðsetninga og horfa til samlegðaráhrifa með þjónustu og húsnæði.
Þannig mætti byggja upp heildstæðari þjónustu við aldraða, sem uppfyllir kröfur nútímans m.a. með tilliti til hjúkrunarheimilis, dagdvalarþjónustu, þjónustumiðstöð aldraðra og stuðningsþjónustu við íbúa í heimahúsum. Sveitarfélög sinna ákveðnum þáttum í nærþjónustu í samstarfi við ríkið en ríkið ber þó alltaf ábyrgð á hjúkrunarþjónustu og hjúkrunarheimilum.
Vestmannaeyjabær hefur mikinn metnað við að gera vel í þjónustu við aldraða. Margt gott er gert en nauðsynlegt er að horfa til framtíðar.
