Nýtt öldukort við Vestmannaeyjar

Hafnadeild Vegagerðarinnar vinnur að því að búa til öldukort af hafinu í kringum landið. Nú þegar er komið nokkuð víðtækt safn slíkra korta og nýverið bættist við öldukort af hafinu í kringum Vestmannaeyjar. Öldukortin nýtast vel þeim sem hyggja á framkvæmdir eða vilja bjóða upp á þjónustu sem tengist hafsvæðinu.

„Við unnum bæði öldukort fyrir nærumhverfi Vestmannaeyja með áherslu á Heimaey og innsiglingu hafnarinnar, svo og öldukort fyrir stærra svæði sem nær upp að landi, út að Þorlákshöfn og niður að Surtsey,“ segir Bryndís Tryggvadóttir, verkfræðingur á hafnadeild Vegagerðarinnar.

Hún útskýrir að þessi öldukort séu nokkuð frábrugðin þeim kortum sem skoða megi á vefnum sjolag.is. „Á sjólagsvefnum má sjá ölduspákort sem sýna núverandi stöðu og spá fyrir um öldufar næstu daga. Öldukortin sem við erum að vinna núna eru fremur eins og greining á öldufari yfir langan tíma. Slík gögn má til dæmis nota til að greina hvort fýsilegt er að fara í framkvæmdir á ákveðnum stöðum. Kortin eru sem dæmi mikilvæg fyrir þá sem hyggja á uppbyggingu í sjókvíaeldi, til að meta hversu raunhæf hún er á ákveðnum stöðum.

Ef endurkomutími mjög hárra alda er tíður minnkar ákjósanleiki slíkra framkvæmda. Einnig nýtast öldukortin ferðaþjónustuaðilum sem vilja bjóða upp á bátsferðir eða aðra þjónustu á þessum svæðum. Með kortunum má meta hversu oft er líklegt að fella þurfi niður ferðir miðað við þá hámarks ölduhæð sem bátarnir ráða við.“

Gögn sem ná yfir 23 ár

Öldukortin eru unnin úr haf- og veðurfræðilegum gögnum frá Samevrópsku Veðurstofunni frá árunum 2000 til 2022. „Þetta eru svokölluð „hindcast“ gögn. Það eru gögn sem eru afturreiknuð,“ útskýrir Bryndís en gögnin eru keyrð í gegnum öldulíkan Vegagerðarinnar áður en tölfræðivinnan á sér stað. Niðurstaðan er sannreynd með samanburði úr mælingum úr duflum Vegagerðarinnar við Landeyjahöfn.

Við fáum þarna gögn sem ná yfir 23 ár og skoðum hvernig aldan hagar sér yfir lengri tíma. Reiknum hæð kenniöldu með 90% og 98% tíðni og eins árs, tíu ára og hundrað ára endurkomutíma, það er hversu háar öldurnar eru sem koma að jafnaði á eins árs, tíu ára og hundrað ára fresti.“

Öldukort við Eyjar

Þegar beiðni barst frá Verkís um öldukort í tengslum við útfærslu á festingum á vatnslögninni sem fór í sundur við Vestmannaeyjar var ákveðið að setja vinnu við öldukort í kringum Eyjar í forgang. Einnig á að bjóða út nýja vatnslögn og því mikilvægt fyrir verkkaupa að hafa grunngögn um öldufar til að byggja á í útboðinu. „Við vorum því beðin um upplýsingarum ölduhæðir með mismunandi tíðni og endurkomutíma,“ segir Bryndís. Og hver er niðurstaðan? „Öldukortin má sjá hér á síðunni en þar kemur meðal annars fram að um 90% ársins er ölduhæð á svæðinu undir 1,2 til 1,8 m rétt utan við mynni hafnarinnar sem þýðir að 10% tímans er ölduhæð yfir þessum mörkum. Þar er eins árs kennialda um þrír til fjórir metrar sem segir okkur að að jafnaði verði slík ölduhæð um einu sinni á ári. Tíu ára kennialda er 3,5 til 4,5 metrar og á hundrað ára fresti metum við að geti komið allt að 6 metra há alda. Ef við horfum á stærra svæði milli lands og Eyja sést sem dæmi að sex metra kennialda getur komið á tíu ára fresti nærri Landeyjahöfn,“ lýsir hún en gaman getur verið að rýna í kortin og skoða ölduhæð á mismunandi stöðum.

Bryndís leggur áherslu á að þó öldukortin séu upplýsandi séu þetta aðeins grunngögn ogséu framkvæmdir fyrirhugaðar við mannvirki sem þurfa að standast ölduálag þurfi frekari greiningar til ákvörðunar á hönnunarálagi. Ekki sé ráðlegt að nota kortin til endanlegra ákvarðana.

 

Bryndís Tryggvadóttir, verkfræðingur á hafnadeild.

Tekið úr fréttabréfi Vegagerðarinnar. Mynd: Heimir Hoffritz

 

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:

  • Heilsíða 170 x 240 mm + 3 mm blæðing 
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing
 
Hafðu samband fyrir verð tigull@tigull.is eða í síma 856-4250

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is
Search