17.04.2020
Í dag tók Vestmannaeyjabær í notkun nýjan vef. Gamli vefurinn var komin á sitt 10. ár og löngu tímabært að aðlaga vefinn að breyttum þörfum nútímans.
Að undangenginni verðkönnun gekk Vestmannaeyjabær til samstarfs við Hugsmiðjuna um gerð nýs vefjar. Lagt var upp með að nýi vefurinn félli að kröfum nútímans um hönnun, útlit og framsetningu. Uppbygging og flæði um síðuna yrði þægilegt fyrir notandann og lykilupplýsingar auðfundnar. Rík áhersla er lögð á skalanleika vefsins í hinum ólíku tölvum og tækjum, svo sem snjalltækjum, símum og spjöldum auk venjulegra heimilistölva.
Með ráðningu fjölmenningarfulltrúi á síðasta ári opnaðist möguleiki á að miðla hluta upplýsinga á vefnum einnig á pólsku og ensku. Með því tekst sveitarfélaginu betur að ná til þeirra hópa íbúa sem ekki hafa íslensku að móðurmáli.
Sjálfvirkt flæði úr fundargátt sveitarfélagsins hefur verið útfært þannig að nú birtast fundargerðir nefnda og ráða sjálfkrafa á vefnum um leið og búið er að samþykkja fundargerðir. Minnisblöð og önnur fylgigögn sem fylgja einstökum dagskrárliðum birtast einnig í fundargerðunum.
Það er von mín að með nýjum vef Vestmannaeyjabæjar verði aðgengi að upplýsingum um sveitarfélagið betra og auðveldara fyrir íbúa, fyrirtæki og starfsmenn sveitarfélagsins að nálgast upplýsingar.
Þar sem tæknin er okkur flestum dálítið óútreikningaleg er hugsanlegt að byrjunarörðugleikar komi upp fyrstu dagana. Vestmannaeyjabær mun standa vaktina, en fólk er jafnframt beðið um að sýna því skilning.
Allar ábendingar um vefinn eru vel þegnar.
Íris Róbertsdóttir,
bæjarstjóri
