Nói Síríus varaði við svindlum á Facebook-síðu sinni fyrr í dag og sagði óprúttna aðila hafa sett upp síður á Facebook í nafni Nóa Síríusar. Er fólk þá beðið um að samþykkja ekki vinabeiðnir frá slíkum síðum.
Í tilkynningu frá Nóa segir:
Aftur virðast óprúttnir aðilar hafa sett upp svindlsíður með nafni Nóa Síríus á Facebook og við ætlum að biðja ykkur um að samþykkja ekki slíkar vinabeiðnir.
Tilgangurinn er sem fyrr að ná persónuupplýsingum með óheiðarlegum hætti með því að gabba fólk til að skrá inn persónuupplýsingar, jafnvel kortanúmer. Við minnum á að í gjafaleikjum á aldrei að gefa upp slíkar upplýsingar enda er aldrei beðið um þær nema um vafasaman tilgang sé að ræða. Verum því áfram á varðbergi fyrir svikahröppum.
Lesum textann vel og vandlega yfir því oftar en ekki eru slíkar svindlsíður með ákaflega bjagaðri íslensku, og slíkt ætti því alltaf að hringja viðvörunarbjöllum. Ef beðið er um persónuupplýsingar eða kortanúmer skal tilkynna síðuna hið snarasta með því að smella á Tilkynna/report.
Með góðri kveðju,
Starfsfólk Nóa Síríus.


