Menningarmótsverkefnið, sem er líka þekkt undir nafninu “Fljúgandi teppi”, er þverfagleg aðferð í starfi með börnum og fullorðnum, hugsuð til þess að varpa ljósi á styrkleika og fjölbreytta menningarheima þátttakenda.
Kristín R. Vilhjálmsdóttir, sem er kennari og menningar- og tungumálamiðlari er hugmyndasmiður verkefnisins sem varð til í kennslustofu hennar í Danmörku árið 2000. Hún hefur mótað og notað Menningarmótin með góðum árangri í kennslu á Íslandi síðan 2008 og leiðbeint við að innleiða verkefnið í fjölmörgum skólum hérlendis og í Danmörku. Kristín var verkefnastjóri fjölmenningar hjá Borgarbókasafninu febrúar 2008 – febrúar 2020 og á því tímabili var verkefnið meðal annars hluti af starfi safnsins.
Á Menningarmótum fá þátttakendur tækifæri til að hittast og kynna sína persónulegu menningu í hvetjandi umhverfi.
Ekki er endilega um að ræða þjóðarmenningu eða upprunamenningu einstaklinga heldur er markmiðið að hver og einn varpi ljósi á það sem skiptir hann mestu máli eða vekur áhuga hans. Á hverju Menningarmóti eru allir í hópnum bæði þátttakendur og áhorfendur.
Markmið Menningarmóta
- Að varpa ljósi á styrkleika þátttakenda og fjölbreytta menningarheima þeirra.
- Að skapa hvetjandi umhverfi, þar sem nemendur, foreldrar og starfsfólk hittast og kynnast menningu og áhugamálum hvers annars.
- Að stuðla að gagnkvæmri virðingu og skilningi.
- Að skapa vettvang þar sem þátttakendur geta undrast og hrifist af því, sem er líkt og ólíkt í menningu þeirra og áhugamálum.
- Að allir mætist í tónlist, dansi, myndlist, bókmenntum, kvikmyndum, matargerð, ævintýrum og goðsögnum, frásagnarlist, leiklist, leik og hreyfingu.
- Að nemendur veiti öðrum hlutdeild í því stolti og þeirri gleði sem fylgir því að miðla eigin menningu og áhugamálum á skapandi hátt.
- Að einstaklingar verði meðvitaðir um gildi eigin menningar og upplifi um leið þau jákvæðu áhrif sem það hefur á sjálfsmyndina að veita öðrum innsýn inn í sinn heim.
- Að þátttakendur geri sér ljóst að fjölbreytt menning, áhugasvið og ólík tungumál mynda mikilvægt menningarlegt litróf í samfélaginu.
Tígull tók stutt spjall við Gunnar, Stefán Geir og Kristján og kannað hvað þeim fannst um Menningarmótið.
