Dagana 20.september 2023 – 24.september 2023 verður haldin áhugaverð listasýning í Eldheimum í Vestmannaeyjum í tilefni Sjávarréttahátíðarinnar Matey 2023.
14 listamenn sýna verk sem vekja athygli á fjölþættum störfum, hlutverkum og verkefnum kvenna í sjávarsamfélögum. Listasýningin verður opnuð formlega á opnunarhátíð Matey 20.september 2023, kl: 17:00 í Eldheimum og allir eru velkomnir og enginn aðgangseyrir.
Í tilefni af Matey – sjávarréttarhátíð árið 2022 var haldin sýning í Einarsstofu á verkum í eigu Vestmannaeyjabæjar sem sýndu konur í sjávarútvegi. Því miður fundust aðeins 3 verk í eigu listasafns Vestmannaeyjabæjar sem sýna konur við störf í sjávarútvegi.
Þó verk í eigu Vestmannaeyjabæjar, sem tengjast konum og sjávarútvegi, séu sorglega fá þá er ekki þar með sagt að slík verk séu ekki til í landinu, bara ekki í Vestmannaeyjum, nema þá auðvitað í einkaeigu inni á heimilum, og svo er auðvitað bara hægt að mála slík verk.
Því var ákveðið að blása til sýningar á Matey – sjávarréttahátíð árið 2023 og þar sem félögum í Lista-og menningarfélaginu í Vestmannaeyjum yrði boðið að taka þátt í sýningu sem ber yfirskriftina „Konur í sjávarsamfélagi.“ Á sýningunni í ár eru 12 listamenn sem sýna einstök verk eða seríu tengdu þemanu alls um 23 verk. Gíslína Dögg Bjarkadóttir listakona í Vestmannaeyjum er sýningarstjóri.
Líklega hefur konum í sjávarsamfélögum ekki verið gefin nægur gaumur þegar kemur að túlkun og framsetningu listamanna í gegnum tíðina og ljóst að áherslan hefur fremur verið á störf karla hjá listafólki. Það er staðreynd að það er ekki bara nóg að veiða fiskinn, heldur þarf líka að hantera hann í framhaldinu á þann hátt að hægt sé að bera hann á borð fyrir fólk.
Sýningunni í Eldheimum er ætlað að heiðra og vekja athygli á fjölþættum störfum, hlutverkum og verkefnum kvenna í sjávarsamfélögum. Konur í sjávarsamfélögum sáu og sjá auðvitað einnig um öll hin fjölmörgu „ósýnilegu“ störf í landi sem nauðsynleg eru svo samfélagið sem heild geti þrifist.
