Laxey hefur samið við AKVA group um hönnun og afhendingu nýrrar seiðastöðvar í Vestmannaeyjum, svokallaðrar Seiðastöðvar II. Með samningnum er stigið mikilvægt skref í áframhaldandi uppbyggingu landeldis félagsins í Eyjum.
Byggt á traustu samstarfi
Samstarf Laxeyjar og AKVA group á sér nokkurra ára sögu, en félögin gerðu fyrst samning árið 2022 um uppbyggingu fyrstu RAS-seiðastöðvarinnar. Sú stöð er nú í fullum rekstri og hefur skilað góðum árangri, bæði hvað varðar afköst og gæði. Þar hefur þegar tekist að framleiða nokkra hópa af hágæða seiðum sem styðja við áframeldi félagsins.
Stór aukning í framleiðslugetu
Nýja seiðastöðin verður byggð upp í áföngum. Í fyrsta áfanga er gert ráð fyrir framleiðslu upp á um 5 milljón seiði á ári, en með frekari uppbyggingu gæti sú tala farið upp í allt að 15 milljón seiði árlega.
Hönnun stöðvarinnar byggir á sömu tækni og notuð hefur verið í fyrri stöð félagsins, sem hefur reynst vel í rekstri. Það skapar aukinn fyrirsjáanleika og dregur úr áhættu í framkvæmdum.
Áformað er að framkvæmdir hefjist í sumar, að því gefnu að fjármögnun gangi eftir, og að starfsemi hefjist á síðari hluta árs 2027.
Uppbyggingin er liður í frekari þróun landeldis í Vestmannaeyjum, þar sem lögð er áhersla á stöðuga framleiðslu og ábyrga nýtingu auðlinda.
