Byggjum upp leikskóla til framtíðar

Tíminn líður hratt og kjördagur nálgast óðum. Tími til kominn að kynna sig en ég heiti Hildur Rún Róbertsdóttir og sit í fjórða sæti Eyjalistans fyrir komandi kosningar 14.maí n.k.
Ég flutti til Vestmannaeyja árið 2017 ásamt manninum mínum, honum Antoni Erni Eggertssyni. Við eigum saman eina litla stelpu, Helgu Dögg 1 árs.

Ég sá fljótt eftir flutninga að hér líður mér vel og hér er gott að vera. Samfélagið hér í Eyjum er engu líkt, það eru allir boðnir og búnir að aðstoða hver annan. Það er stutt á milli staða, hér er gott að ala upp börn og verja tímanum sínum en við erum svo heppin að vera með framúrskarandi veitingastaði og verslanir í heimabyggð.

Ég er með B.Ed gráðu í kennarafræði og starfa sem deildarstjóri í leikskóla. Ég er með stórt leikskólahjarta en að mínu mati skipta leikskólar miklu máli fyrir þroska og velferð barnanna okkar. Í leikskólanum er lagður grunnur að öllu námi. Leikskólinn er fyrsta skólastigið og í heimsfaraldri hefur hann staðið sem grunnstoð samfélagsins.

Við erum svo lánsöm hér í Vestmannaeyjum að við erum með tvo frábæra leikskóla og fimm ára deild sem brúar bilið á milli leik- og grunnskóla vel! Starfsfólkið í báðum leikskólum og í Víkinni bera hag barnanna fyrir brjósti, mætir daglega og er eins og samfélagið í heild sinni, boðið og búið til þess að veita börnunum væntumþykju og hlýju, kenna þeim og leiðbeina á þessum fyrstu árum lífs þeirra.

Þá kemur að pólítíkinni en að mínu mati getum við gert betur fyrir leikskólana okkar og fimm ára deildina. Á kjörtímabilinu sem er að líða hefur verið lögð áhersla á snemmtæka íhlutun í leikskólum sem er jákvætt en við verðum að bæta aðstöðu barnanna til leiks. Leikur er þeirra megin námsleið líkt og kemur fram í Aðalnámskrá leikskóla og aðstæður verða því að vera í lagi. Við verðum að setja okkur skýrar reglur um barngildi, bæta aðbúnað og hljóðvist á deildum og bæta vinnuaðstöðu kennara. Við viljum halda áfram að sjá uppsveiflu í barnafjölda en við verðum að hafa aðstöðu fyrir þau og setja okkur háleit markmið þegar kemur að leikskólamálum hér í bænum.

Við í Eyjalistanum viljum byggja upp leikskóla til framtíðar. Við gerum þó okkur grein fyrir því að það gerist ekki á augabragði. Það er því nauðsynlegt að sinna úrbótum á núverandi húsnæði leikskólana og Víkinni. Í náinni framtíð, þegar lögð verða drög að nýrri leikskólabyggingu verðum við að hugsa stórt og byggja í takt við þá uppsveiflu sem er í gangi í sveitarfélaginu. Það þýðir ekki að byggja of lítið og frekar gera ráð fyrir niðursveiflu og sitja uppi með sömu vandamál innan nokkurra ára, að það sé ekki pláss fyrir fleiri börn í leikskólunum okkar.

Leikskólinn hefur staðið sem grunnstoð samfélagsins s.l tvö ár og á þá virðingu skilið að sveitarfélagið leggi áherslu á að gera vel við börnin sem þar nema og starfsfólkið sem er bókstaflega með framtíðina í höndum sér.
Ég hvet ykkur kæru Vestmannaeyjingar til þess að nýta ykkar kosningarrétt 14.maí n.k.

Hildur Rún Róbertsdóttir

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:

  • Heilsíða 170 x 240 mm + 3 mm blæðing 
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing
 
Hafðu samband fyrir verð tigull@tigull.is eða í síma 856-4250

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is
Search