22.01.2020
Bráðabirgðaniðurstaða krufningar á líkum tveggja ferðamanna sem fundust á Sólheimasandi síðastliðinn fimmtudag bendir til þess að fólkið hafi orðið úti í óveðri sem gekk yfir dagana þar á undan.
Fólkið var frá Kína, karlmaður fæddur árið 1997 og kona fædd árið 1999.
Í tilkynningu frá lögreglunni á Suðurlandi segir að ekki séu merki um aðkomu utanaðkomandi aðila og ekki er grunur um að saknæmt athæfi hafi átt sér stað.
Áfram verður unnið úr þeim gögnum sem aflað hefur verið til að varpa frekari ljósi á ferðir fólksins á þessum slóðum. Endanleg niðurstaða krufningar mun liggja fyrir að einhverjum vikum liðnum.
Aðstandendur fólksins komu til landsins síðastliðinn sunnudag og fundaði lögregla með þeim og fulltrúum kínverska sendiráðsins á mánudag.
Greint er frá þessu á vef sunnleska.is
