Jólatónleikar Kórs Landakirkju eru einn af þeim viðburðum sem marka upphaf jólahátíðarinnar hjá mörgum bæjarbúum. Eins og undanfarin ár verða tónleikarnir tvískiptir og dagskráin mjög fjölbreytt, allt frá sálmum til dægurlaga.
Fyrri hlutinn er í safnaðarheimilinu en eftir hlé er áherslan meira á sálma og hátíðlegri tónlist og fer sá hluti fram í kirkjunni sjálfri. Augnablikið þar sem allir viðstaddir, tónlistarfólk og gestir, kveikja á kertum og syngja saman Heims um ból í myrkvaðri kirkjunni kveikir svo sannarlega á jólastemmingunni í hjörtum hátíðargesta.
Undanfarin ár hafa ýmsir einsöngvarar tekið þátt í tónleikunum með kórnum og er einsöngvari í ár Silja Elsabet Brynjarsdóttir Eyjakona. Eins og þeir vita sem sóttu tónleika hennar og Helgu Bryndísar Magnúsdóttur píanóleikara á goslokunum, þá er Silja Elsabet söngkona á heimsmælikvarða og svo sannarlega tilhlökkunarefni að heyra í henni á heimavelli á þessari hátíðlegu stund.
Tónleikarnir í ár eru miðvikudaginn 11. desember kl. 20.00 og er miðaverði stillt í hóf eins og undanfarin ár, 2.500 kr.
Athygli er vakin á því að kórinn er ekki með rafrænan posa og reiðufé er því vel þegið.
