Jólasíld Vinnslustöðvarinnar var afhent starfsmönnum við hátíðlega athöfn á föstudaginn og þar með er hægt að segja með sanni að glitti í hátíðarnar miklu við sjóndeildarhringinn.
Ingigerður Helgadóttir, flokksstjóri í uppsjávarvinnslunni, stýrði afhendingarathöfninni. Hún hefur verið í forystu verkefnishópsins sem hóf undirbúningsstörf í október og skilar lostætinu nú eftir að hafa tekið við hálfu þriðja tonni af hráefni til framleiðslunnar.
Þór Vilhjálmsson allsherjarreddari fyllti svo skott sendibíls af fötum með jólasíld og afhendir þær hluthöfum og vildarvinum félagsins um helgina og næstu daga.
Starfsmönnum VSV var boðið upp á síldarveislu í kaffistofunni glæsilegu í gær. Þar var árgangur ’21 af jólasíld að sjálfsögðu á borðum + rúgbrauð, egg, maltesín að drekka með og jólakonfekt í restina.
Greint er frá þessu á vef Vinnslustöðvarinnar, einnig eru myndir þaðan.
