Jólaminning – skemmtilegar heimildir frá því að fyrsta jólatréið var sett upp

25.12.2020

Það þarf ekki allt að vera stærst og mest til að gleðja og næra.
Til eru skemmtilegar heimildir um fyrsta jólatréð sem var sett upp í Vestmannaeyjum af sýslumannshjónunum Maríusi og Agnesi Aagaard sem hér bjuggu á árunum 1875-1890.
Þær sýna vel hversu litlir hlutir geta veitt bæði þeim sem gefa og hinum sem þiggja birtu og yl. Agnes hélt dagbók sem enn er varðveitt og þar veitir hún okkur innsýn til jólanna 1878 er fyrsta tréð var sett upp. Agnes segir í dagbókinni sinni:
Á jóladag vorum við Signe [vinnukonan] önnum kafnar við jólatréð. Það var eins bert og hönd mín. Hvergi sást á því barr. Ætlunin hafði verið að þekja það með lyngi, en frostið kom í veg fyrir að hægt væri að ná í það. Hálfum mánuði áður hafði ég náð í lítilsháttar af lyngi og með því vöfðum við toppinn. Þó að það væri ljótt og visið, var það þó betra en ekki neitt.
Það getur verið áhugavert fyrir okkur í nútímanum að gægjast inn fyrir á jóladaginn hjá sýslumannshjónunum, sem þá voru flutt í nýbyggða Uppsali milli Vestmannabrautar og Faxastígs, og sjá hvernig dagurinn leið:
Jólamorguninn færði Signe okkur te í rúmið. Kl. 2 borðuðum við morgunverð og læknirinn [Þorsteinn Jónsson], borðaði með okkur. Um kvöldið átti aftur að kveikja á jólatrénu fyrir 11 gestkomandi börn. Þau komu kl 4 og læknirinn, Bjarnasen [Gísli, verslunarstjóri] og kona hans [María Ásmundsen]. Fyrst gáfum við þeim kaffi. Síðan var þeim hleypt þar sem jólatréð stóð og voru þau alveg undrandi yfir þeirri sjón, sem þau sáu. Enginn hér í eyjunni hefur nokkru sinni fyrri séð jólatré og öll voru þau stórhrifin.
Við gáfum hverju barni smáhlut, sem við höfðum gert, auk fléttaðra krossa, rósa og slíkra muna. Veitingarnar voru: Piparhnetur, rúsínur og brjóstsykur, sem Maríus hafði soðið. Ég held að kvöldið hafi verið öllum ánægjulegt.
Þessi litla saga úr fjarlægri fortíð Eyjanna sýnir okkur að þrátt fyrir allt sem fylgt hefur í kjölfarið á Covid-19 þá er samt það sem skiptir í raun eitt máli ennþá eftir til allrar Guðs mildi hjá flestum okkar: Við eigum hvert annað.
Jóla- og nýarskveðja
Kári Bjarnason, forstöðumaður Safnahúss Vestmannaeyja
Share on facebook
Share on twitter
Share on linkedin
Share on google
Share on pinterest

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:
  • Heilsíða 170 x 240 mm + 3 mm blæðing
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is