Ís­lensk erfða­greining hættir allri CO­VID-19 skimun

Kári Stefáns­son, for­stjóri Ís­lenskrar erfða­greiningar, segir að ÍE mun hætta öllum sam­skiptum við sótt­varna­lækni og land­lækni útaf CO­VID-19 frá og með deginum í dag. ÍE mun af­greiða síðustu sýnin sem berast til þeirra á mánu­daginn í næstu viku. Þetta kemur fram í grein sem Kári skrifar á Vísir.is í dag.

„Við erum búin leggja okkar að mörkum og kominn tími til þess að við förum að sinna dag­vinnu okkar og engu öðru. Frá og með deginum í dag 6. júlí munum við hætta öllum sam­skiptum við sótt­varnar­lækni og land­lækni út af SARS-CoV-2. Síðustu sýnin sem við munum af­greiða eru þau sem berast til okkar á mánu­daginn 13. júlí,“ skrifar Kári.

Kari birti einnig tölvupóstsam­skipti sín við ríkis­stjórn Ís­lands. Í bréfi þann 1. júlí sagði Kári að ÍE myndi hætta allri skimum fyrir CO­VID-19 nema ríkis­stjórnin myndi setji á fót Far­alds­fræði­stofnun Ís­lands, stofnun sem ætti að vera undir stjórn sótt­varna­læknis og innan land­læknis­em­bættisins.

„Ég ætla ekki að telja upp þær vit­leysur sem við höfum leið­rétt vegna þess að þær skipta ekki máli lengur. Við getum hins vegar ekki sinnt þessu mikið lengur vegna þess að við höfum önnur verk að vinna. Þess vegna þarf að búa til nýtt afl innan ís­lensks heil­brigðis­kerfis til þess að höndla þetta, Far­alds­fræði­stofnun Ís­lands. Hún þarf að búa að sam­einda­líf­fræði, töl­fræði, stærð­fræði, smit­sjúk­dóma­fræði og á­kveðinni getu til þess að hreyfa verk­efni hratt og á­kveðið,“ skrifaði Kári til ríkis­stjórnarinnar.

Hann segir Ís­lenska erfða­greiningu vera til­ í að hýsa stofnunina til að byrja með að Sturlu­götu 8.

„Við gætum líka verið vara­lið og hjálpað við að byggja stofnunina upp. Þessi stofnun ætti að vera undir stjórn sótt­varnar­læknis, innan land­læknis­em­bættisins. Það er ekki hægt að láta svona stofnun vera ein­angraða litla eyju innan Land­spítalans,“ skrifar Kári enn fremur en ríkis­stjórnin fékk þrjá daga til að svara tillögu Kára.

„Ef ekki verður farið að byggja upp svona getu innan heil­brigðis­kerfisins strax í dag er aug­ljóst að Þjóðin lendir innan skamms í miklum vanda. ÍE fer fram á að ríkis­stjórnin gefi út yfir­lýsingu á næstu dögum um að það verði strax ráðist í að setja saman svona appa­rat. Ef það verður ekki gert neyðumst við til þess að hætta allri að­komu að skimun og öðrum þáttum sótt­varna, vegna þess að án þess verðum við að halda á­fram að van­rækja þá vinnu sem okkur er ætluð. Ef þið á­kveðið að ráðast í að búa til Far­sóttar­stofnun Ís­lands erum við reiðu­búin til þess að að­stoða eftir megni“

Sérstök stofnun sett á fót til að vinna tillögu Kára
Katrín Jakobs­dóttir, for­sætis­ráð­herra, svaraði Kára þann 4. júlí, en þar segir hún að til­laga Kára verður tekin til skoðunar. Sér­stök stofnun verður sett á fót til að vinna úr til­lögunni. Hún þakkar honum jafnframt fyrir sitt framlag í baráttunni við COVID-19.

„Því hefur verið á­kveðið að ráða verk­efna­stjóra undir yfir­stjórn sótt­varna­læknis. Hann fær það verk­efni að greina hvernig megi efla inn­viði heil­brigðis­kerfisins til að takast á við far­aldra fram­tíðarinnar, með hlið­sjón af til­lögu þinni og þeirri reynslu sem við höfum öðlast í glímunni við co­vid-19. Jafn­framt mun hann að­stoða sótt­varna­lækni við að ná sem bestum tökum á yfir­standandi far­aldri í nánu sam­starfi við þig og fyrir­tæki þitt,“ skrifar Katrín.

Í grein sinni segir Kári að það er ljóst á svörum for­sætis­ráð­herra að þetta vanda­mál sé ekki eins brátt á henni og á ÍE.

„Þú gengur út frá því sem vísu að við ætlum að halda á­fram að sinna skimuninni án þess að hafa nokkurn skapaðan hlut með það að gera hvernig að henni er staðið sem heild í hugsun og verki. Og það sem meira er þér liggur ekkert á að setja saman appa­rat til þess að taka við af okkur. Þetta gengur ein­fald­lega ekki. Við hjá ÍE erum viss um að það sé engin aðili í landinu sem kunni betur til þeirra verka sem við höfum tekið að okkur í þessum faraldri. Þú ert hins vegar á þeirri skoðun að þú hafir verkefnastjóra sem gæti búið til á þessu betri skilning og hjálpað til við að koma þjóðinni áfram til framtíðarskipulags. Okkar skoðun er sú að öll framkoma þín og heilbrigðismálaráðherra gagnvart ÍE í þessu máli hafi markast af virðingarleysi fyrir okkur, framlagi okkar og því verkefni sem við höfum tekið að okkur í þessum faraldri,“ skrifar Kári.

Hann segir að lokum að þát­töku ÍE er lokið og engin á­stæða sé til þess að erfa það sem orðið er.

Frá þessu er greint á vef Fréttablaðsins.