Knattspyrnukonan Andrea Rán Snæfeld Hauksdóttir hjá Breiðabliki greindist með kórónuveiruna í dag. Andrea kom heim til Íslands frá Bandaríkjunum fyrir leik Breiðabliks gegn Selfossi í 2. umferð Pepsi Max-deildarinnar hinn 18. júní síðastliðinn.
Samhæfingarstöð almannavarna staðfesti að leikmaður í efstu deild kvenna hafi greinst með veiruna og Fótbolti.net greinir frá að Andrea sé sú smitaða.
Andrea kom inn á sem varamaður í leiknum gegn Selfossi og aftur gegn KR í gær. Þurfa væntanlega allir leikmenn og þjálfarateymi Breiðabliks að fara í sóttkví næstu tvær vikurnar, sem og leikmenn KR.
Munu liðin væntanlega ekki spila næstu vikurnar, en næsta umferð Pepsi Max-deildarinnar fer fram næstkomandi þriðjudag og miðvikudag, en allir sem hafa verið útsettir fyrir smiti í samskiptum við hana þurfa að fara í sóttkví næstu 14 dagana.
Fréttatilkynning frá Samhæfingarstöð almannavarna:
Í dag greindist íslensk knattspyrnukona í efstu deild með jákvætt sýni í COVID-19 sýnatöku. Hún kom til landsins 17. júní sl. og reyndist sýnataka á landamærum neikvæð. Síðar kom í ljós að hún hafði verið í nánd við smitaðan einstakling erlendis og fór því aftur í sýnatöku. Sú sýnataka reyndist jákvæð. Sem stendur er hún einkennalaus. Allir sem hafa verið útsettir fyrir smiti í samskiptum við hana síðastliðna tvo sólarhringa þurfa að fara í sóttkví í 14 daga. Smitrakning er í gangi en ljóst er að margir þurfa að fara í sóttkví. Málið er í vinnslu og frekari upplýsinga er að vænta á morgun.
Greint er frá þessu á mbl.is
