ÍBV vann dramatískan 4–3 sigur á nýkrýndum bikarmeisturum Þróttar í Bestu deild kvenna á Hásteinsvelli í gær. Eyjakonur lentu undir en svöruðu með þremur mörkum fyrir
leikhlé og héldu út þrátt fyrir áhlaup gestanna.
Katie Cousins kom Þrótti yfir á 19. mínútu eftir hraða sókn gestanna. Sigríður Theódóra Guðmundsdóttir sendi boltann fyrir markið og Cousins fylgdi vel á eftir og skoraði í autt mark.
Eyjakonur voru þó ekki lengi að svara. Ágústa María Valtýsdóttir nýtti sér mistök í vörn Þróttar, komst ein í gegn og jafnaði metin á 30. mínútu. Tíu mínútum síðar kom Olga Ševcova ÍBV yfir með laglegri vippu eftir frábæra sendingu Fridrikku Marie Clementsen.
Samvinna þeirra Ševcova og Clementsen skilaði síðan þriðja marki ÍBV í uppbótartíma fyrri hálfleiks. Ševcova sendi þá boltann fyrir frá vinstri og Clementsen skoraði með glæsilegu skoti. Staðan var því 3–1 í hálfleik.
Bríet Fjóla Bjarnadóttir minnkaði muninn fyrir Þrótt snemma í síðari hálfleik eftir mistök Guðnýjar Geirsdóttur í marki ÍBV. Allison Grace Lowrey endurheimti hins vegar tveggja marka forskot heimakvenna þegar hún skallaði fyrirgjöf Jessicu Jean Hinton í netið.
Björgey Njála Andreudóttir skoraði sitt fyrsta mark í Bestu deildinni undir lok leiksins og minnkaði muninn í 4–3. Jöfnunarmarkið lét þó bíða eftir sér og Eyjakonur fögnuðu dýrmætum sigri.
ÍBV er eftir sigurinn í þriðja sæti deildarinnar með 30 stig en Þróttur situr í fimmta sæti með 23 stig.
Ljósmyndir: Addi London
