Þær Konný, Ruth Zohlen og Sísí Högna sýna í Einarsstofu kl. 13.00 á laugardaginn 28. september.

Vestmannaeyjar í gegnum ljósopið mitt mun í fyrsta sinn sýna rúllandi ljósmyndir eftir 3 konur á laugardaginn en þær eru allar þekktar sem ljósmyndarar til margra ára.

Laufey Konný Guðjónsdóttir, eða Konný, verður með blöndu af landslagsmyndum frá Eyjum ásamt því að bregða upp sýnishorni af hinu fjölbreytta mannlífi þar í gegnum tíðina. Þá er hún mikill dýravinur og mun ferfætlingum einnig bregða fyrir.

Sigríður Högnadóttir, eða Sísí Högna, bregður á leik með skugga og birtu eyjanna. Undir áhrifum frá listinni dragast fram nýjar myndir úr þekktum mótífum.
Ruth Barbara Zohlen, eða Ruth, hefur gaman af því að ganga um Eyjuna og upplifa hana sem lifandi fyrirbæri. Ruth mun sýna afmælisbarnið í vetrarham sem og þegar hamnum er kastað.

Ljósmyndadagskráin er hluti af dagskrám afmælisnefndar í tilefni af 100 ára afmæli Vestmannaeyjabæjar og er rétt að árétta að aðeins er um að ræða eina ljósmyndasýningu sem rúllar á sýningartjaldi frá kl. 13 á laugardaginn kemur.