Fyrir mér var hápunktur sumarsins þegar við fórum saman fjölskyldan í sumarbústað við Egilsstaði og vorum þar í um 25 stiga hita! Þar nutum við lífsins, fórum á hestbak og óðum í Atlavík. Þetta var yndislegur tími segir Njáll Ragnarsson þegar blaðamaður Tíguls spurði hann hvað hefði staðið uppúr á árinu 2021 þá fyrir utan Covid.
Að öðru leyti er margt sem kemur upp í hugann. Menntarannsóknarverkefnið „Kveikjum neistann“ hófst í GRV sem miðar að því að efla velferð barna í skólanum. Fyrir mér eru skólarnir hornsteinn samfélagsins og okkur ber að tryggja að þeir séu alltaf í fremstu röð.
Þá verður alltaf eftirminnilegt þegar við Hafþór Snorrason tókum að okkur að lýsa lokaleik ÍBV í sumar í sjónvarpi! Þar fóru með hljóðnemann tveir menn sem hafa verið þekktir fyrir ýmislegt annað en þekkingu á knattspyrnu en ég held að okkur hafi tekist ágætlega til! Það var mjög ánægjulegt að strákarnir okkar í ÍBV eru á nýjan leik komnir í deild þeirra bestu og eru því bæði karla- og kvennaliðin okkar á þeim stað í dag.
Í haust kusum við svo til Alþingis og skipaði ég 5. sæti á lista Framsóknarflokksins í Suðurkjördæmi sem vann mikinn kosningasigur. Þetta var afskaplega skemmtileg reynsla og vonandi fæ ég tækifæri til að tala máli Vestmannaeyja á þingi á komandi árum.
Stefnir þú á að bjóða þig fram til áframhaldandi setu í bæjarstjórn?
Fjögur ár eru ekki langur tími í pólitík! Ég hef áhuga á því að halda áfram á þeirri braut sem við höfum verið á undanfarin fjögur ár, þ.e. áhersla á fjölskylduna, skólamál og góða þjónustu við íbúa almennt. Þetta kemur ekki af sjálfu sér. Ég hef því tilkynnt mínu fólki hjá Eyjalistanum að ég sé tilbúinn til þess að halda áfram sé það vilji félagsmanna.
Njáll Ragnarsson
Deildarstjóri hjá Fiskistofu og
Formaður bæjarráðs Vestmannaeyjabæjar
