Vestmannaeyjabær hefur ráðið Hrefnu Valdísi Guðmundsdóttur sem héraðsskjalavörð á Skjalasafni Vestmannaeyja.
Hrefna er fædd og uppalin í Eyjum og hefur búið þar alla tíð. Hún er með stúdentspróf frá Framhaldsskólanum í Vestmannaeyjum ásamt því að hafa lokið prófi sem sjúkraliði frá sama skóla.
Þá er hún með BA próf í þjóðfræði ásamt diplómu í hagnýtri skjalfræði frá Háskóla Íslands en það nám er ætlað þeim er hyggjast vinna við skjalavörslu og skjalastjórn, m.a. á opinberu skjalasafni. Starfsferill hennar hófst eins og margra hér í bæ í vinnuskólanum en í fiskvinnslu byrjaði hún 12 ára gömul.
Um tvítugt réð hún sig á Hraunbúðir við aðhlynningu og síðar sem sjúkraliði á Sjúkrahúsinu. Hrefna hefur starfað í Safnahúsi Vestmannaeyja frá árinu 2012, lengst af við Ljósmyndasafnið. Síðasta eitt og hálft árið hefur hún haft umsjón með Skjalasafninu, fyrst í veikindum héraðsskjalavarðar og síðar er sá sagði sig frá stöðunni. Hrefna hefur því víðtæka þekkingu í námi og starfi á Skjalasafninu.
Hrefna hefur störf sem héraðsskjalavörður hinn 1. janúar nk.
Héraðsskjalasafn Vestmannaeyja er eitt af söfnum Safnahússins.
