Hljómsveitin Brek heimsækir Eyjar um helgina og heldur tónleika í Eldheimum í kvöld. „Við í hljómsveitinni Brek hlökkum gríðarlega mikið til að koma til í Eyja til að hlaupa í Puffin Run og halda svo tónleika í Eldheimum um kvöldið!,“ sagði Sigmar Þór Matthíasson bassaleikari sveitarinnar í samtali við Tígul.
Hljómsveitin Brek var stofnuð haustið 2018. Sveitin leikur aðallega frumsamda, alþýðu skotna, tónlist með áhrifum úr ýmsum áttum, en meðlimir sveitarinnar leggja mikla áherslu á að skapa áhugaverða en notalega stemningu í hljóðfæraleik sínum. Auk þess er lögð áhersla á fjölskrúðuga notkun íslenskrar tungu í textagerð.
Hljómsveitina skipa Harpa Þorvaldsdóttir söngkona og píanóleikari, Jóhann Ingi Benediktsson gítarleikari og söngvari, Guðmundur Atli Pétursson mandólínleikari og Sigmar Þór Matthíasson bassaleikari.
Síðastliðin tvö ár hafa verið viðburðarík hjá Brek þrátt fyrir heimsfaraldur. Þann 30. mars síðastliðinn hlaut Brek t.a.m. Íslensku tónlistarverðlaunin 2021 fyrir plötu ársins í flokki þjóðlaga- og heimstónlistar.
Tónleikarnir fara fram í Eldheimum í kvöld og hefjast kl. 20.00. Miðaverð er kr. 3.500.
