27.05.2020
Björgunarsveitir voru kallaðar út um klukkan rúmlega hálf eitt í nótt til leitar við Ölfusá þar sem tilkynning barst um að maður hefði dottið í ána af Ölfusárbrú.
Maðurinn fannst tæpum klukkutíma síðar í trjárjóðri við leikhúsið á Selfossi skammt ofan brúarinnar. Hann var handtekinn, grunaður um gabb og var látinn gista fangageymslur, að sögn Frímanns Birgis Baldurssonar, varðstjóra hjá lögreglunni á Suðurlandi
Björgunarfélag Árborgar, Hjálparsveit skáta í Hveragerði og Björgunarsveitin Björg á Eyrarbakka voru kallaðar út ásamt lögreglu, slökkviliðsmönnum frá Brunavörnum Árnesinga og sjúkraflutningamönnum af Heilbrigðisstofnun Suðurlands. Aðgerðastjórn var virkjuð í Björgunarmiðstöðinni á Selfossi.
Á milli 30 og 40 manns leituðu mannsins og fyrsti bátur var kominn á ána aðeins ellefu mínútum eftir að útkallið barst.
Greint er frá þessu á vef sunnleska.is – Forsíðumyndin tengist fréttinni ekki.
