Tólf einstaklingar voru kærðir fyrir fíkniefnabrot síðastliðinn sólarhring í Vestmannaeyjum og var hald lagt á „nokkurt magn fíkniefna“ í einu tilfelli. Önnur mál voru þó minniháttar.
Fyrsta nótt þjóðhátíðar var að öðru leyti afar róleg hjá lögreglunni í Vestmannaeyjum, að því sem fram kemur í tilkynningu.
Einn var kærður fyrir akstur undir áhrifum áfengis og annar fyrir akstur undir áhrifum fíkniefna.
Þá komu engin ofbeldisbrot til kasta lögreglu en einn gisti í fangageymslu sökum ölvunarástands.
„Það er mat lögreglu að hátíðahöldin hafi farið vel fram í nótt og fólk almennt skemmt sér fallega,“ segir svo í tilkynningunni.
Nú skín sólin á lofti og fólk fer á ferð um bæinn og dalinn.
Lögrelgan vill benda íbúum og gestum bæjarins á að rafhlaupahjól skulu vera notuð á göngustígum og má einungis einn vera á hverju hjóli, þá minnum hún á notkun hjálmsins. Séu fleiri á rafhlaupahjóli en einn og séu slík hjól notuð á akbrautum getur skapast umferðahætta og viljum við koma í veg fyrir slíkt.
Hér að neðan er hægt að horfa á fræðslumyndband um rafhlaupahjól sem Samgöngustofa lét búa til og fer myndbandið vel yfir reglurnar um rafhlaupahjól.
Við hvetjum fólk til að kynna sér þessar reglur.
