03.05.2020
Föstudaginn 8. maí næst komandi verður Sigurjón Ernir Sturluson íþróttafræðingur, Boot Camp-þjálfari, einkaþjálfari, hlaupari og áhugamaður um hreyfingu og mataræði með fyrirlestur í Eldheimum kl. 21:00 – 22:00 í boði Eyjaskokk hópsins.
ATH – til að tryggja sér sæti þarf að senda póst á katalaufey@tigull.is því aðeins 50 manns komast að þá með Sigurjóni.
Hér er góð kynning á Sigurjóni en DV tók viðtal við hann þann 13.apríl 2020
Sigurjón Ernir Sturluson er afreksíþróttamaður, þjálfari og faðir. Hann hefur bullandi áhuga á hreyfingu og næringu, enda þarf hann að vera með þau atriði á hreinu til að geta hlaupið 128 kílómetra fjallahlaup með 7.500 metra hækkun.
En hvað borðar maður sem þarf að hafa orkuna í hámarki? Ef þú vilt vita hvað maðurinn sem getur hlaupið 128 kílómetra í senn, æfir tvisvar á dag og fer í ísbað á kvöldin, þá skaltu halda áfram að lesa.
Hefðbundinn dagur
Hefðbundinn dagur í lífi Sigurjóns Ernis er vel skipulagður enda nóg að gera. Hann starfar sem markaðs- og kynningarfulltrúi hjá Sportvörum og heldur úti Fjarþjálfun Sigurjóns Ernis. Við báðum hann um að lýsa venjulegum degi í sínu lífi.
„Eftir að ég eignaðist dóttur mína, Líf Sigurjónsdóttur, þá leyfi ég mér að sofa aðeins lengur en áður fyrr. Svefninn er án efa okkar mikilvægasta athöfn. Ég fer í háttinn klukkan 22:00 og vakna yfirleitt á milli 6:30-7:00. Ég reyni að ná góðum teygjum með kaffibollanum og blaðinu á morgnanna. Á sama tíma reyni ég að gera ungu dömuna klára í leikskólann. Eftir að sú stutta er komin í leikskólann reyni ég að ná stuttri æfingu sem er yfirleitt interval hlaupaæfing eða hjól með laufléttu styrktarsetti í lokin,“ segir Sigurjón Ernir.
Sigurjón vinnur í Sportvörum á milli 9-17:00 og tekur yfirleitt aðra æfingu rétt fyrir kvöldmat. Eftir kvöldmat vinnur hann í fjarþjálfunarrekstri sínum og endar síðan daginn á 3-4 mínútna ísbaði.
„Ég er með kaldan pott heima. Ísbaðið hjálpar mér með endurheimt og betri svefn.“
Einn fremsti Spartan-hlaupari Íslands
Sigurjón Ernir er með fremri fjallahlaupurum á Íslandi og er einn fremsti Spartan-hlaupari landsins. Spartan-hlaup snúast um að hlaupa ákveðna vegalengd og klára ýmsar krefjandi hindranir og þrautir í gegnum hlaupið.
„Mín keppnishlaup eru allt frá 5 km götuhlaupi yfir í 128 kílómetra fjallahlaup með mikilli hækkun. Spartan-hlaupin eru allt frá 8-12 kílómetrar með 15-25 hindrunum til 50+ kílómetrar með yfir 60 hindrunum,“ segir hann.
Fastar í sólarhring í hverri viku
„Ég hef lengi notast við föstur í minni daglegu rútínu og notast við form af föstu sem er kallað 16/8. Þá borða ég ekkert milli 20:00-12:00 og borða svo fjórar máltíðir á milli 12-20:00. Ég hef einnig bætt við 24 klukkustunda föstu alltaf einu sinni í viku frá sunnudagskvöldi til mánudagskvölds. Yfir daginn er ég að innbyrða um 3.000-3.500 kaloríur. Ég er grænmetisæta í dag og hef verið það í þrjú ár. Ég legg áherslu á að borða holl matvæli og passa að fá nóg af próteini og fitu í gegnum mitt mataræði. Ég tek einnig vítamín úr Terranova línunni hjá Heilsu ehf og Foodspring bætiefni, en áherslan á mína næringu liggur alltaf í mataræðinu og matvælum.“
Uppáhalds máltíð
„Það er engin ákveðin máltíð mín uppáhaldsmáltíð. Ég reyni að hafa fjölbreytni og hollustu í fyrirrúmi. En mín uppáhalds svindlmáltíð er sennilega fjögurra osta pítsa sem er oftar en ekki líka fyrir valinu hjá mér kvöldið fyrir krefjandi keppni, mikil orka í slíkri máltíð. En fastan hefur hjálpað mér að þjálfa líkamann í að þola stórar og orkumiklar máltíðir sem er mikill kostur fyrir ultra hlaup. Þar sem mikilvægasti hlutinn af keppninni er að næra sig vel í gegnum hlaupið.“
Þetta borðar Sigurjón Ernir á venjulegum degi:
Morgunmatur:
„Ég hef bara ekki borðað morgunmat í nokkur ár og aldrei verið betri, minn morgunmatur er 300-500ml af vatni og góður kaffibolli, ef ég tek ekki vatnsföstu.“
Hádegismatur:
„Hafragrautur með grófum höfrum, chia fræjum, sólblómafræjum, hampfræjum, hnetumixi, 3 teskeiðar af grófu hnetusmjöri og Foodspring próteindufti. Einnig verður oft góður réttur á Spírunni fyrir valinu.“
Millimál:
„330 ml kolvetnaskert hleðsla með tveimur lágkolvetna brauðsneiðum með smjöri og osti. Eða hleðsla og hreint skyr með hnetumixi og chia fræjum.“
Millimál nr. 2:
„Foodspring prótein út í 330 ml möndlumjólk og banani + Foodspring próteinstykki.“
Kvöldmatur:
„Orkumikið salat með Terranova Life Drink út á. Eftirréttur er oftar en ekki grísk jógúrt með próteini og dass af hnetumixi.“
Sigurjón deilir hér uppskriftinni að orkumikla salatinu:
Hráefni:
- Bygg
- Tófú (eða annað sojakjöt)
- Ferskt grænmeti
- Hnetur
- Vínber
- Edamame-baunir
- Avókadó
- Mæjónes
- Terranova Life drink
Aðferð:
Fyrst sýð ég bygg í potti í 45 mínútur, sýð yfirleitt mikið magn til að eiga. Um leið steiki ég tófú á pönnu í nokkrar mínútur.
Á meðan sker ég ferska grænmetið og blanda því í skál með salati og bæti við hnetum og fræjum. Að lokum bæti ég mæjónes og Terranova Life Drink út á og borða með bestu list.
Það er hægt að fylgjast með Sigurjóni Erni á samfélagsmiðlum.
Instagram: @sigurjonernir
Snapchat: @sigurjon1352
Facebook: Fjarþjálfun Sigurjóns Ernis
