Farið var yfir stöðu stærstu framkvæmda Vestmannaeyjabæjar á fundi bæjarráðs 24. ágúst síðastliðinn. Brynjar Ólafsson, sviðsstjóri umhverfis- og framkvæmdasviðs, mætti á fundinn og gerði grein fyrir stöðu verkefna, meðal annars við Íþróttamiðstöðina, gatnagerð og fráveitu og nýja flóðlýsingu á Hásteinsvelli.
Framkvæmdir við Íþróttamiðstöðina
Viðamiklar framkvæmdir standa yfir við Íþróttamiðstöðina. Vinna við sökkla viðbyggingarinnar er hafin og er unnið skipulega frá vestri til austurs til að auðvelda jarðvinnuverktökum að moka ofan í grunninn innan sökkla. Samkvæmt grófri áætlun á uppsteypu að vera lokið í mars eða apríl.
Samhliða þessu hefur verið unnið að endurbótum innanhúss. Endurnýjun lýsingar í æfingasölum 2 og 3 gengur vel og verklok þar eru áætluð fyrir komandi mánaðamót. Þá er endurnýjun í sundlaugakjallara langt komin. Helstu framkvæmdum þar er lokið en unnið að lokafrágangi, meðal annars við skjámynd og stýringu í vaktbúri og færslu klórskynjara.
Sólhlíð stefnt í malbikun í september
Framkvæmdir við gatnagerð og fráveitu eru einnig umfangsmiklar. Í Sólhlíð er verið að leggja lokahönd á fráveituframkvæmdir. Næstu vikur er gert ráð fyrir að HS Veitur ljúki lagningu hita-, vatns- og rafveitu og ef áætlanir standast verður gatan malbikuð um miðjan september.
Í Miðgerði hefur götustæðið verið grafið út að fullu og vinna við fráveitu stendur yfir. Þar hefur framkvæmdatíminn þó ekki staðist upphaflegar áætlanir verktaka.
Flóðljósamöstrin rísa á Hásteinsvelli
Framkvæmdir við nýja flóðlýsingu á Hásteinsvelli eru einnig komnar vel á veg. Vinnu við undirstöður er lokið og samkvæmt minnisblaðinu er reiknað með að verktakar komi til Eyja um mánaðamótin ágúst og september til að reisa möstrin og setja upp ljósabúnaðinn.
Að uppsetningu lokinni verður gengið frá umhverfinu í kringum möstrin. Þá þykir líklegt að steypa þurfi stoðvegg við mastrið í norðausturhorni vallarins til að halda aftur af jarðvegi.
Samkvæmt yfirliti yfir eignfærðar framkvæmdir sveitarfélagsins á árinu 2026 er gert ráð fyrir umtalsverðum fjárfestingum á árinu, þar sem framkvæmdir við Íþróttamiðstöðina eru stærsti einstaki liðurinn.
