Víðir Þorvarðarson, Felix Örn Friðriksson og Óskar Elías Zoega Óskarsson hafa allir framlengt samninga sína við ÍBV.
Felix gerði þriggja ára samning Víðir tveggja og Óskar eins árs.
Felix er tvítugur vinstri bakvörður en hann hefur skorað eitt mark í 80 meistaraflokksleikjum með ÍBV. Felix á tvo A-landsleiki að baki og fjórtán leiki með U21 liði Íslands en hann var síðasta vetur á láni hjá Vejle í Danmörku í nokkra mánuði.
Víðir er 27 ára gamall kantmaður. Víðir hefur einnig leikið með Stjörnunni, Fylki og Þrótti á ferlinum en hann hefur skorað 32 mörk í 200 leikjum í meistaraflokki á ferlinum.
Óskar Elías er 23 ára gamall varnarmaður. Hann á 26 leiki að baki með ÍBV í efstu deild en hann hefur einnig leikið með Þór, KFS og BÍ/Bolungarvík á ferlinum.
Óskar mun ásamt því að spila með ÍBV koma af krafti í þjálfun yngri flokka sem og styrktarþjálfun hjá félaginu.
Frá þessu er greint á vefsíðu ÍBV-íþróttafélags.
