06.03.2020 kl 20:56
Eins og fram kom á blaðamannafundi Almannavarnadeildar Ríkislögreglustjóra í dag kl. 15 þá hefur Ríkislögreglustjóri lýst yfir neyðarstigi almannavarna í samráði við sóttvarnalækni vegna sýkinga af völdum kórónaveiru, COVID-19. Það var gert m.a. vegna þess að sýkingin er nú farin að breiðast út innanlands.
Staðan í Vestmannaeyjum er þannig að enginn einstaklingur er staðsettur í Vestmannaeyjum með staðfest smit og enginn einstaklingur með grun um slíkt. Ekki hefur þurft að taka sýni vegna líklegra tilfella fram að þessu. Líklegt er að þetta muni breytast á næstu dögum og miðast undirbúningur almannavarna að því að svo verði.
Ekki hefur verið lagt bann við fjöldasamkomum að svo stöddu, en það er ekki útilokað að til þess komi.
Aðgerðastjórn hefur sinnt undirbúningsvinnu ásamt viðbragðsaðilum og viðbragð uppfærist nú samkvæmt nýju stigi almannavarna.
