16.12.2020
Vestmannaeyjingar hafa löngum verið miklir knattspyrnuáhugamenn og oft og tíðum náð í titla á þeim vettvangi.
Hér á eftir eru nokkrar spurningar úr bókinni Fótboltaspurningar 2020, eftir feðgana Guðjón Inga Eiríksson og Bjarna Þór, son hans.
Og svariði nú!
- Hvaða lið varð bikarmeistari kvenna árið 2019 og það í fyrsta sinn í sögu sinni?
- Eyjapeyinn Tryggvi Guðmundsson er markahæstur allra í efstu deildinni með 131 mark. Þessi mörk hefur hann skorað með fjórum liðum. Þrjú þeirra eru ÍBV, FH og KR, en hvert er hið fjórða?
- Hverrar þjóðar er Teemu Pukki?
- Hvaða afríska landslið hefur gælunafnið Ljónin frá Teranga?
- Hvernig eru sokkarnir á litinn í aðalbúningi Frakka?
- Hvaða leikmaður Bandaríkjanna, sem varð heimsmeistari kvenna 2019, var kosin Knattspyrnukona ársins þetta sama ár af Alþjóðaknattspyrnusambandinu, sem iðulega er kallað FIFA?
- Hvaða liði hafa þeir allir stýrt: Gianfranco Zola, Avram Grant, Sam Allardyce og Slaven Bilic?
- Með hvaða liði lék Bruno Fernandes áður en hann gekk í raðir Manchester United?
- Frá hvaða landi eru liðin Servette og Luzern?
- Hver er maðurinn: Hann fæddist 15. október 1988 og hefur spilað til dæmis með Pierre-Emerick Aubameyang, Sergio Ramos og Thomas Müller? Við hvern er átt?
- Hvaða knattspyrnukona segir frá ævi sinni, þótt ung sé að árum, í bókinni Óstöðvandi sem út kom árið 2019?
- Hvaða knattspyrnufélag leikur heimaleiki sína á Ásvöllum?
- Árið 2019 var sýnd á N4 heimildamynd um knattspyrnumenn í Ungmennafélagi Borgarfjarðar eystri, UMFB. Þeim var fylgt eftir í utandeildarkeppninni eitt sumarið og kom þar margt skemmtilegt og forvitnilegt í ljós. Heimildamyndin heitir eftir kunnu slagorði úr íþróttaheiminum og kemur það þrisvar fyrir í heiti hennar. Hvað heitir hún?
- Margrét Lára Viðarsdóttir tilkynnti í nóvember 2019 að hún væri hætt keppni í knattspyrnu. Ferill hennar spannar mörg ár, með ÍBV, Val og nokkrum erlendum liðum, en hversu oft varð hún markadrottning Íslandsmótsins?
- Hvaða landslið leikur heimaleiki sína á Windsor Park?
Svör:
- Selfoss.
- Fylkir.
- Finnskur.
- Senegal.
- Rauðir,
- Megan Rapinoe.
- West Ham.
- Sporting Lissabon.
- Sviss.
- Mesut Özil.
- Sara Björk Gunnarsdóttir.
- Haukar.
- Berjast, berjast, berjast!
- Fimm sinnum (2004, 2005, 2006, 2007 og 2008 – í fyrsta skiptið með ÍBV, hin með Val).
- Norður-Írland.


