Það hefur verið fínasta fiskirí hjá Eyjunum að undanförnu. Bæði Bergey VE og Vestmannaey VE lönduðu fullfermi í Vestmannaeyjum sunnudaginn 7.mars og Bergey landaði á ný fullfermi á þriðjudag 9.mars og Vestmannaey á miðvikudag 10.mars.
Bergey kom síðan til hafnar með 45 tonn þann 11,mars. Jón Valgeirsson, skipstjóri á Bergey, segir að það sé að koma vertíðarbragur á veiðarnar. „Við höfum verið að afla vel og aflinn hefur verið blandaður. Við höfum mest verið á Víkinni og Pétursey, Selvogsbankanum og sunnan við Surt. Það hefur að mestu verið gott veður þannig að þetta hefur bara gengið nokkuð vel,“ segir Jón.
Birgir Þór Sverrisson, skipstjóri á Vestmannaey, tekur undir með Jóni og segir að vel hafi gengið að fiska. „Tveir síðustu túrar hjá okkur hafa gengið vel. Við höfum fyllt skipið á um tveimur sólarhringum. Annars finnst mér vertíðarfiskurinn vera heldur seint á ferðinni til dæmis inn á Selvogsbankann. Það er ekki enn komið það magn inn á svæðið sem gera má ráð fyrir þó fiskist ágætlega. Við höfum verið að eltast við allar tegundir að undanförnu og höfum helst verið að veiða á Pétursey og Vík, í Háfadýpinu og á Planinu við Einidrang. Mér finnst þetta líta ágætlega út,“ segir Birgir Þór.
Greint er frá þessu á vef Síldarvinnslunnar
