Vestmannaeyjabær veitti viðurkenningar í fimm flokkum fyrir framúrskarandi framtak í umhverfismálum, snyrtimennsku og vel heppnaðar endurbætur. Viðurkenningarnar hlutu Davíð Guðmundsson, veitingastaðurinn Gott, Hábær, garðurinn við Smáragötu 2 og Hátún 14.
Hildur Sólveig Sigurðardóttir, formaður umhverfis- og skipulagsráðs, afhenti viðurkenningarnar fyrir hönd Vestmannaeyjabæjar. Hún sagði verkefnið eitt það ánægjulegasta sem ráðið sinnti og vakti athygli á því að umhverfismál snerust ekki aðeins um stór viðfangsefni á borð við loftslagsbreytingar, náttúruvernd og sorpmál.
Umhverfið væri einnig gatan sem fólk byggi við, húsin sem það sæi út um gluggann og fyrirtækin sem það ætti viðskipti við. Vel hirt hús, fallegir garðar og snyrtileg fyrirtæki hefðu áhrif á samfélagið í heild, styrktu bæjarbraginn og gerðu Vestmannaeyjar að fallegri og skemmtilegri stað til að búa á og heimsækja.
Óvenjumargar tilnefningar bárust að þessu sinni. Að lokinni vettvangsskoðun fulltrúa allra flokka í ráðinu var ákveðið að veita viðurkenningar í fimm flokkum.
Davíð Guðmundsson verðlaunaður fyrir framtak í umhverfismálum
Davíð Guðmundsson, oft kenndur við Tölvun, hlaut viðurkenningu fyrir framtak á sviði umhverfismála. Sérstaklega var horft til framlags hans við uppbyggingu innviða fyrir rafbíla í Vestmannaeyjum.
Davíð kom árið 2020 upp 11 kW heimahleðslustöð við Strandveg 50 og opnaði hana öllum rafbílaeigendum án endurgjalds. Á þeim tíma var skortur á aðgengilegum hleðslustöðvum í Eyjum. Síðar bættust við tvær Tesla Destination Charging-stöðvar á sama stað og hafði Davíð einnig milligöngu um uppsetningu þriggja stöðva á Básaskersbryggju.
Þegar Eyjafréttir fjölluðu um framtakið árið 2023 hafði meira en 100 þúsund kílóvattstundum verið miðlað án endurgjalds frá stöðvunum við Strandveg. Davíð hafði þá sjálfur staðið undir kostnaðinum, sem var kominn í um 1,5 milljónir króna.
Síðan hefur hleðsluinnviðum fjölgað verulega í Vestmannaeyjum, meðal annars með hraðhleðslustöðvum við Krónuna og Fiskiðjuna, auk stöðva við fyrirtæki og heimili.
Frumkvæði Davíðs einskorðast þó ekki við rafbíla. Hann hefur ítrekað hvatt til þess að Vestmannaeyjar verði gerðar að grænni eyju og nýttar sem tilraunasveitarfélag fyrir nýjar og umhverfisvænar lausnir.
Davíð átti jafnframt stóran þátt í því að koma Vestmannaeyjum inn á Google Street View. Eftir að opinber kortlagning Google náði ekki til Eyjanna fékk hann styrk úr verkefninu „Viltu hafa áhrif?“ og tók sjálfur upp þrívíddarmyndir á um 110 kílómetrum af vegum og slóðum á Heimaey. Hann tók einnig upp ferð út í Suðurey.
Þá kom Davíð að uppsetningu vefmyndavélar við Skiphella ásamt Herði Bald. Myndavélin sýndi meðal annars fuglabjargið og Sprönguna og var hljóði og mynd miðlað beint á netið.
Davíð var auk þess stofnandi deiliskútuleigunnar Hopps í Vestmannaeyjum. Rafhjóluðum kílómetrum á vegum fyrirtækisins hefur nú fjölgað í meira en 300 þúsund og áætlaður sparnaður í losun koltvísýrings er tæp 300 tonn, að sögn Davíðs. Hann er einnig formaður Stjörnufræðifélags Vestmannaeyja.
Í umsögn ráðsins segir að Davíð hafi sýnt mikla framsýni og verið óþreytandi við að benda á ný tækifæri í umhverfis- og nýsköpunarmálum. Vestmannaeyjabær þakkaði honum ómetanlegt framlag og hugsjónastarf.
Gott snyrtilegasta fyrirtækið
Veitingastaðurinn Gott við Bárustíg 11 hlaut viðurkenningu sem snyrtilegasta fyrirtækið.
Í rökstuðningi ráðsins segir að Gott hafi lengi verið áberandi kennileiti í hjarta miðbæjarins. Gult bárujárnið, skemmtileg hönnun og einkennandi leturgerð á húsinu gefi staðnum glaðlega og bjarta ásýnd.
Innanhússhönnun staðarins þótti einnig vel heppnuð. Þar kallast hlýir jarðtónar og nútímaleg hönnun á við eldri og nostalgískari einkenni, svo sem útsaumaða bakstuðninga og loftljós sem minna á liðna tíð. Einnig var bent á sjálfbæra og umhverfisvæna nýtingu efniviðar í húsgögnum staðarins.
Að mati ráðsins styður Gott við jákvæða og líflega upplifun í miðbæ Vestmannaeyja, jafnt fyrir heimafólk sem gesti.
Smáragata 2 með snyrtilegasta garðinn
Garðurinn við Smáragötu 2 var valinn snyrtilegasti garðurinn eftir að fulltrúar ráðsins höfðu heimsótt nokkra tilnefnda garða.
Augljóst þótti að mikill metnaður og ómæld vinna hefði verið lögð í ræktun garðsins. Honum er lýst sem fjölskrúðugum og margbreytilegum, nánast eins og mörgum görðum í einum, þar sem sífellt blasir eitthvað nýtt við þegar gengið er um hann.
Endurbætur á Hábæ til fyrirmyndar
Hábær hlaut viðurkenningu fyrir vel heppnaðar endurbætur. Húsið fékk flestar tilnefningar frá almenningi að þessu sinni.
Hábær stendur hátt og á áberandi stað í bænum. Í umsögn ráðsins segir að endurbæturnar hafi tekist afar vel og lyft ásýnd hússins. Sigmar Helgason, eigandi Hábæjar, hefur verið ötull við að dytta að eigninni og er að mati ráðsins vel að viðurkenningunni kominn.
Hátún 14 snyrtilegasta eignin
Hátún 14 hlaut viðurkenningu sem snyrtilegasta eignin. Fjölmargar eignir komu til greina í flokknum og tók ráðið fram að víða í Vestmannaeyjum legði fólk mikinn metnað í viðhald húsa sinna og nærumhverfis.
Húsið við Hátún 14 þótti einkar snyrtilegt og bera þess merki að hafa fengið gott og stöðugt viðhald í gegnum tíðina. Aðkoma, ásýnd hússins og garðurinn mynda þar fallega heild.
Eigendur hússins, Hulda og Orri, tóku við viðurkenningunni.
