Þriðjudagur 25. júní 2024

Ferðaþjónustan og náttúra Suðurkjördæmis

Náttúra Suðurkjördæmis er í senn áhugaverð og ólík en einnig yfirþyrmandi og óbeisluð

Hið magnaðasambland íss og elds, beljandi jökulfljóta, formfagurra fossa, svartra stranda og blómlegra
landbúnaðarhéraða dregur að erlenda sem innlenda ferðamenn og nær á þeim heljartökum. Í þessu felst
mikil gæfa fyrir Suðurkjördæmi en einnig áskoranir.

Utan höfuðborgarsvæðisins sækja flestir erlendir ferðamenn Suðurkjördæmi heim af öðrum
landshlutum. Það kemur okkur sem búum í kjördæminu kannski ekki á óvart en rannsóknir sýna að
nánast allir þeir ferðamenn sem hafa heimsótt Suðurkjördæmi eru mjög eða frekar ánægðir með dvöl
sína í landshlutanum. Við vitum hversu fallegt hér er, en þetta staðfestir mikilvægi landshlutans hvað
varðar orðspor Íslands erlendis og mikilvægi þess í ferðaþjónustu á Íslandi.

Ferðaþjónustan og frjálsa framtakið 

Það má segja að við hér í Suðurkjördæmi höfum fengið ferðaþjónustuna bratt í fangið á árunum eftir
fjármálahrunið. Víða voru innviðir ekki tilbúnir til að mæta auknum fjölda ferðamanna og hin opinbera
umgjörð hafði ekki verið byggð upp í kringum ferðaþjónustuna líkt og nú er, hvað sem fólki finnst um eðli
hennar og gagn í dag. Það var því að mestu frjálsa framtakið sem tók á móti straumi erlendra
ferðamanna, byggði upp, fann upp og hugsaði upp lausnir, afþreyingu og þjónustu.

Það hefur verið ótrúlegt að fylgjast með uppbyggingunni í ferðaþjónustunni í Suðurkjördæmi síðasta
áratuginn. Þjónustan og afþreyingin sem ferðamönnum er nú boðið upp á er ótrúlega fjölbreytt en
jafnframt áhugaverð og eftirsótt. Ferðaþjónustan er eitt dæmið af mörgum um hvernig frjálsa framtakið
getur gert ótrúlega hluti fái það tækifæri til að blómstra.

Að loknu heimsfaraldri

Ferðaþjónustan er ákaflega þýðingarmikil fyrir Suðurkjördæmi. Straumur erlendra gesta og hugvitssemi
og frumkvöðlaandi íbúa Suðurkjördæmis hefur gert það að verkum að fólk getur búið áfram í sinni sveit
og sinnt oft stórkostlega skemmtilegri vinnu með áhugasömum erlendum gestum.

Nú þegar sést til lands í baráttunni við heimsfaraldurinn er ljóst að ferðaþjónustan mun vera ein af
lausnunum við það mikla atvinnuleysi sem nú er á Íslandi og því þurfa stjórnvöld að halda áfram
stuðningi sínum við aðila í ferðaþjónustu þannig að ferðaþjónustan verði í stakk búin við að taka á móti
öllum þeim erlendum ferðamönnum sem hyggja á ferðir til Íslands. Ég trúi því að Ísland og
Suðurkjördæmi allt verði í fararbroddi þegar fólk byrjar að ferðast á ný.

Eflum Suðurkjördæmi!

Guðrún Hafsteinsdóttir í 1. sæti í prófkjöri Sjálfstæðisflokksins í Suðurkjördæmi

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:

  • Heilsíða 170 x 240 mm + 3 mm blæðing 
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing
 
Hafðu samband fyrir verð tigull@tigull.is eða í síma 856-4250

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is
Search