- Bæjarfjölmiðillinn í Vestmanneyjum -

Huginn, Ísleifur

Farnir út að leita að Makríl

Huginn og Ísleifur eru að fara út í kvöld að leita af makríl sagði Sindi Viðarsson Sviðstjóri Vinnslustöðvarinnar í samtali við Tígul í gær.
„Það er verið að klára ákveðna viðhaldsvinnu um borð í Kapinni og á ég von á henni hingað í lok vikunnar og þá geta þeir líka farið á sjó. Þannig að vonandi finnst einhver makríll hérna við Eyjar og við getum farið að setja vinnsluna af stað,, segir Sindri.

Einnig sagði Sindri að Gullbergið væri að leggja af stað frá Skagen og færi þá til Noregs að skila af sér veiðarfærum og leggur af vonandi af stað til Íslands í lok vikunnar þannig að þau reikna með þeim í Eyjum um helgina, en það skýrist betur þegar líður á vikuna.

Tígull hafði haft fréttir af því að Sighvatur Bjarnason VE væri á förum frá Eyjum og spurðum við Sindra út í það.

Já það er rétt, búið að selja Sighvat Bjarnason VE, hann var seldur til félags í Hong Kong.

Hvenær var byrjað að veiða Makríl í fyrra ?

Við byrjuðum að leita af makríl í júní í fyrra en það var enginn löndun fyrr en í júlí. Núna er aðstæður betri þ.e.a.s. vorið hefur verið sólríkt og sjávarhiti er hærri en á sama tíma í fyrra þannig að við erum bjartsýn að makrílinn sé kominn. En það skýrist væntanlega á næstu dögum sagði Sindri að lokum.

Eins og kom fram í frétt frá Vinnslustöðinni um daginn þá eru nokkrar nafnabreytingar á flotanum:

  • KAP VE-4 verður Sighvatur Bjarnason VE-81
  • KAP II  verður  KAP VE-4
  • Garðar verður Gullbeg VE-292

Við hæfi er að rifja ögn upp sögu skipsnafnanna þriggja

Gullberg

Vinnslustöðin eignaðist 35% hlut í Ufsabergi ehf. á árinu 2008 og tók þá um leið við útgerð skips félagsins, Gullbergs. Síðar sameinuðust félögin undir nafni Vinnslustöðvarinnar.

Ufsaberg var stofnað 1969 og gerði út fjögur skip með sama nafni og númeri, Gullberg VE-292. Guðjón Pálsson, einn eigenda Ufsabergs, var meðal aflasælustu  skipstjóra Vestmannaeyja.

Eyjólfur sonur hans tók við skipstjórn og útgerð Gullbergs þegar faðir hans lést árið 1987. Eyjólfur Guðjónsson er nú skipstjóri á Vinnslustöðvarskipinu Ísleifi VE-63.

Vinnslustöðin seldi síðasta Gullbergið úr landi sumarið 2017.

Sighvatur Bjarnason

Vinnslustöðin átti um árabil og gerði út nóta- og togveiðiskipið Sighvat Bjarnason VE-81 sem smíðað var í Noregi 1975. Skipið lá hin síðari ár við bryggju í Vestmannaeyjum og var selt úr landi á dögunum. Það var nefnt eftir Sighvati Bjarnasyni eldri (1903-1975), fyrsta aflakóngi Vestmannaeyja og landsþekktum skipstjóra. Sighvatur hætti til sjós 1959 og gerðist framkvæmdastjóri Vinnslustöðvarinnar. Þegar Stefán Runólfsson tók við sem framkvæmdastjóri 1974 var Sighvatur kjörinn stjórnarformaður Vinnslustöðvarinnar og gegndi formennskunni til dauðadags.

Fjölskylduþræðirnir eru sterkir enn þann dag í dag. Guðmunda Áslaug Bjarnadóttir Sighvatssonar, fiskverkandi og útgerðarmaður í Vestmannaeyjum, er í stjórn Vinnslustöðvarinnar og hefur verið undanfarin ár. Sonur hennar, Sindri Viðarsson, er sviðsstjóri uppsjávarsviðs Vinnslustöðvarinnar.

KAP

Þetta skipsheiti vefst fyrir ýmsum að skilja og ekki að undra. Kap er nefnilega gælunafn stúlkubarns og á rætur að rekja til bandarískrar skáldsögu, The Hidden Hand – Hin hulda hönd – sem birtist fyrst ytra 1859 en kom út í íslenskri þýðingu árið 1905 undir heitinu Kapítóla. Bókin varð geysivinsæl hérlendis sem annars staðar. Jón Jónsson, útgerðarmaður í Vestmannaeyjum, var í fjölmennum hópi fólk sem heillaðist af sögunni um Kapítólu og þau hjón, Jón og Þórunn Snorradóttir, skírðu eina dóttur sína Þuríði Kapítólu. Sú var víst allaf kölluð Kap og þá förum við að verða sjóðheit í leit að útskýringu á þessu skipsheiti Vinnslustöðvarinnar.

Kapítólu í skáldsögunni er þannig lýst að hún hafi verið hugdjörf, kraftmikil og uppreisnargjörn og helst ekki viljað hlýða nokkrum manni. Hún lenti í lífsháska oftar en einu sinni og oftar en tvisvar en bjargaði sér með djörfung og hugdirfsku.

Kapítóla læddist ekki með veggjum eins og mörgum fannst að konur ættu jafnan að gera, aðallalega auðvitað karlpeningi. Jónas Jónsson frá Hriflu skrifaði hneykslunargreinar í blöð um Kapítólu og sama gerði Bjarni frá Vogi.

Halldór Laxness tók hins vegar upp hanskann fyrir uppreisnarstelpuna og íslenskan útgefanda bókarinnar, Jóhann Jóhannesson. Í æviminningum sínum, Í túninu heima – útgefnum 1975, lýsti Nóbelsskáldið því yfir að Kapítóla væri „ágæt bók“ en hvaða dóna sem er hefði haldist uppi að kasta rýrð á Jóhann útgefanda sögunnar.

Auglýsingar í blaðið

Skil á auglýsingum er í hádeginu á mánudögum.  Auglýsingar sendist á tigull@tigull.is Stærðirnar eru:

  • Heilsíða 170 x 240 mm + 3 mm blæðing 
  • Hálfsíða 170 x 120 mm + 3 mm blæðing
  • Kvartsíða 84 x 120 mm + 3 mm blæðing
  • Renningur 170 x 60 mm + 3 mm blæðing
  • Kubbur 84 x 59 mm + 3 mm blæðing
 
Hafðu samband fyrir verð tigull@tigull.is eða í síma 856-4250

Auglýsingar á vefinn

Auglýsingar sendist á tigull@tigull.is Stærðirnar eru:
  • Stór banner – þver yfir síðuna 1018 x 360 px
  • Auglýsing hægra megin 310 x 400 px
Hægt er að skoða aðrar stærðir – endilega sendið okkur póst á tigull@tigull.is