Svo virðist sem sjaldgæfir flækingsfuglar hafi tekið sérstakt ástfóstri við Vestmannaeyjar þessa dagana. Skömmu eftir að kúhegri vakti athygli í Eyjum sást annar óvenjulegur gestur á vappi í Búhamrinum – fugl sem allt bendir til að sé bognefur (Plegadis falcinellus).
Hér er hægt að lesa fréttina af kúhegranum.
Það var ljósmyndari Tíguls, Addi í London, sem rak augun í fuglinn skammt frá heimili sínu í Búhamrinum. Addi lét ekki sitt eftir liggja og náði bæði ljósmyndum og myndbandi af þessum óvenjulega gesti.
Bognefur er auðþekkjanlegur á löngum og áberandi niðursveigðum goggi sínum. Hann er dökkur yfirlitum og getur virst nánast svartur úr fjarlægð, en þegar birta fellur á fiður fullorðinna fugla koma í ljós fallegir málmkenndir litir í grænum, brons-, rauðbrúnum og fjólubláum tónum.
Leitar ætis í votlendi
Bognefur er meðalstór vaðfugl af íbisætt. Hann verður um 48–66 sentímetrar að lengd og vegur gjarnan á bilinu 530–770 grömm. Hann heldur einkum til í votlendi, grunnum tjörnum, mýrum og á blautum túnum.
Hinn sérstæði goggur er öflugt verkfæri við fæðuöflun. Fuglinn stingur honum niður í leðju og mjúkan jarðveg og leitar þar meðal annars að skordýrum og öðrum smádýrum.
Sjaldgæfur gestur á Íslandi
Bognefur er flækingsfugl hér á landi og ekki hluti af íslenska varpstofninum. Tegundin er hins vegar víðförul og hefur útbreiðsla hennar aukist í Evrópu. Í Bretlandi hefur bognef til að mynda fjölgað verulega sem gesti samhliða aukningu í varpstofnum í suðvestanverðri Evrópu.
Það er einnig athyglisvert að óvenju mikið sást af bognefjum á Íslandi árið 2025 og var þá talað um metár í komum tegundarinnar.
Komi staðfesting á að fuglinn í Búhamrinum sé bognefur verður þetta því enn ein óvenjuleg fuglaheimsóknin til Vestmannaeyja á skömmum tíma. Fyrst kúhegri – og nú virðist bognefur hafa ákveðið að kíkja til Eyja.
