Engu mátti muna að illa færi í morgun þegar bryggjupolli brotnaði með þeim afleiðingum að Huginn VE losnaði frá bryggju.
Tígull heyrði í Guðmundi Inga Guðmundssyni skipstjóra Hugins VE nú upp úr hádegi.
Guðmundur Ingi ásamt einum háseta rétt náðu að hoppa um borð en báturinn hékk aðeins á einum spotta þegar þeir komu að. Í fyrstu hélt Guðmundur Ingi að skipið væri laust frá en sá svo að sem betur fer hélt einn spotti enn.
Huginn VE kom í land í gærkvöldi með rúmlega 2000 tonn af Loðnu og beið eftir að komast í löndun þegar atvikið átti sér stað. Guðmundur Ingi segir að það myndist oft sog í höfninni og þegar báturinn er svona þungur þarf ekki mjög mikið til að svona gæti gerst. En ekki er algengt að polli losni frá bryggju líkt og hér gerðist.
Þegar Tígull heyrði í Guðmundi Inga var Huginn nýfarinn í löndun og stefna þeir á að halda til veiða á ný fljótlega eftir löndun sem verður ekki fyrr en seint í nótt eða snemma í fyrramálið.
