18.12.2020
Á fundi bæjarráðs í gær ræddi Bæjarstjóri litaviðvörunarkerfi sem almannavarnir kynntu á dögunum.
Samkvæmt kerfinu er allt landið merkt rautt, þ.e. neyðarstig. Bæjarstjóri hefur verið í samskiptum við almannavarnir um stöðuna í Vestmannaeyjum og hvort litaviðvörunarkerfið taki mið af því að ekki hafa komið upp smit í Vestmannaeyjum í langan tíma.
Almannavarnir hafa svarað því að þann hátt að fleiri þættir en staðbundið ástand eru metnir í litaviðvörunarkerfinu.
Engin áramótabrenna í ár
Ákveðið hefur verið að hætta við áramótabrennu á vegum Vestmannaeyjabæjar að þessu sinni vegna samkomutakmarkana stjórnvalda. Með því er dregið úr hættunni á því að fólk safnist saman af þessu tilefni. Verið er að skoða með lögreglustjóra Vestmannaeyja hvort flugeldasýningin verði leyfð. Tilkynnt verður um það á næstu dögum.
Fyrirkomulag þrettándagleðinar verður kynnt þegar nær dregur
Þrettándagleðin verður með mjög breyttu sniði í upphafi næsta árs í ljósi samkomutakmarkana en fyrirkomulagið verður kynnt þegar nær dregur.
Bæjarráð þakkar bæjarbúum
Bæjarráð vill koma á framfæri þakklæti til íbúa í Vestmannaeyjum fyrir að taka þátt í og sýna aðgerðum um fjöldatakmarkanir og öðrum sóttvarnaraðgerðum sem í gildi eru skilning.
Með tilkomu bóluefnis eru vonir bundnar við að bjart sé framundan og ekkert til fyrirstöðu að hefja uppbyggingu og vöxt að nýju þegar þessu ástandi lýkur.
