Stefnt er að því að efnisvinnsla við Sprönguna víki af svæðinu og að ráðist verði í endurheimt þess og bætta aðkomu. Málið var tekið fyrir á fundi umhverfis og skipurlagsráði Vestmannaeyjabæjar, en samkomulag við Steina og Olla um afnot af bæjarlandi við Sprönguna er útrunnið.
Sprangan hefur um langt skeið skipað sérstakan sess í sögu og menningu Vestmannaeyja auk þess að vera vinsæll áfangastaður ferðamanna. Á undanförnum árum hefur fyrirtækið Steini og Olli haft afnot af svæði þar við til efnisvinnslu.
Nýr samningur Vestmannaeyjabæjar við aðila sem sinna efnisvinnslu í Vestmannaeyjum felur hins vegar meðal annars í sér að efnisvinnslan við Sprönguna víki af svæðinu.
Ábendingar um ásýnd og erfiða aðkomu
Ábendingar hafa borist um að aðkoma að Spröngunni sé erfið, ekki síst fyrir rútur, auk þess sem gerðar hafa verið athugasemdir við ásýnd svæðisins.
Í gögnum sem lögð voru fram með málinu má meðal annars sjá umfang efnisvinnslusvæðisins og núverandi aðstæður þar. Ljósmyndir sýna vinnslubúnað og efnishauga í næsta nágrenni við Sprönguna.
Fyrir liggur einnig deiliskipulagstillaga fyrir Sprönguna þar sem afmörkun svæðisins, lóðir og aðkoma koma fram.
Búnaður og efni verði fjarlægt
Þar sem samkomulag um afnot af bæjarlandinu er útrunnið hefur starfsmönnum Vestmannaeyjabæjar verið falið að ræða við Steina og Olla um að fjarlægja búnað og efni af svæðinu.
Jafnframt er lagt til að við gerð fjárhagsáætlunar Vestmannaeyjabæjar fyrir árið 2027 verði tekið tillit til kostnaðar við framkvæmdir til að bæta aðstöðu og aðkomu að Spröngunni.
Með því yrði stigið skref í átt að endurheimt svæðisins og bættri umgjörð um þennan sögulega stað í Vestmannaeyjum.
