Efla þarf samþættingu á þjónustu við fatlað fólk

Framkvæmdastjóri fjölskyldu- og fræðslusviðs ræddi stöðu Heimaeyjar – vinnu- og hæfingarstöðvar og mikilvægi þess að fara í endurskoðun á starfseminni þar á síðasta fundi fjölskyldu- og tómstundaráðs.
Í Heimaey er veitt mikilvæg þjónusta í formi verndaðrar vinnu, hæfingar og dagþjónustu fyrir fatlað fólk ásamt þjónustu við örorkuþega. Aukin þörf er á að stækka aðstöðu dagþjónustu, hæfingar og virkniþjálfunar auk þjónustu við fötluð börn á grunn- og framhaldsskóla aldri í formi lengdrar viðveru eftir skóla eða í sumarúrræði. Efla þarf samþættingu á þjónustu við fatlað fólk. Einnig er þörf á því að styrkja stuðninginn við atvinnumál fatlaðs fólks og öryrkja í samvinnu við VMST. Ráðið tekur undir þau sjónarmið sem farið var yfir á fundinum og felur framkvæmdastjóra að kalla saman starfshóp sem leggur fyrir ráðið hugmyndir að framtíðarskipulagi á starfsemi Heimaeyjar og nauðsynlegum breytingum þeim tengdum. Í starfshópnum sitja auk framkvæmdastjóra sviðs, Þóranna Halldórsdóttir forstöðumaður Heimaeyjar, Björg Bragadóttir umsjónarþroskaþjálfi og Silja Rós Guðjónsdóttir umsjónarfélagsráðgjafi.