Síðastliðinn mánudag hófst verkfall hjá starfsfólki Leikskólans á Kirkjugerði
Verkfallsaðgerðir hófust mánudaginn 22. maí í Vestmannaeyjum þegar að starfsfólk á Kirkjugerðinni hófu verkfall. Sem stóð yfir á þriðjudag og í dag fimmtudag. Það mun halda áfram næstkomandi þriðjudag 30. maí, 31. maí og 1. júní en þá bætist einnig starfsfólk Vestmannaeyjahafnar við.
Tígull náði tali af Eyju Bryngeirsdóttur skólastjóra leikskólans Kirkjugerði. „Það eru 12 kennarar í verkfalli hjá okkur og hefur verkfallið mikil áhrif á nemendur okkar og þeirra fjölskyldur. Hvað varðar starfsemi skólans hefur verkfallið ekki enn aukið álag á kennara þar sem fjöldi nemenda miðast við hversu margir kennarar eru í vinnu. Eins og staðan er núna þá er ein deild hjá okkur alveg lokuð fyrir hádegi þessa vikuna sem verkfallið er og tveir til þrír kennarar eru á hinum deildunum. Kennsla verður ekki eins markviss og á venjulegum skóladegi þar sem að stór hluti nemenda geta ekki mætt í skólann fyrr en kl. 12.00. Þetta er mikið rót fyrir nemendur og erfitt fyrir þau að mæta í skólann á þessum tíma dags“, segir Eyja í samtali við Tígul.
